Allariz convida a gozar dos mellores produtos de tempada na súa Feira de Outono
Este mercado chega á súa XXVIII edición e contará con máis de 30 postos chegados da Reserva da Biosfera de Allariz, de diferentes puntos de Galicia, Castela e León e tamén do veciño Portugal. Contará con actividades paralelas e celebrarase os días 9 e 10 de novembro no Pavillón do Instituto.
Por Galicia Confidencial | Allariz | 07/11/2024 | Actualizada ás 09:00
Este evento gastronómico, que se celebrará no Instituto de Allariz os días 9 e 10 de novembro, ten como obxectivo poñer en valor os produtos de tempada do outono. Deste xeito, os produtores participantes ofrecerán, entre outras cousas, mel, cogomelos, noces, castañas e os seus derivados, dispoñibles para a venda entre as 10:30 e as 20:00 horas.
A feira contará con produtores da Reserva da Biosfera de Allariz, así como doutros puntos de Galicia, de Castela e León e de Portugal. En palabras da organización, "esta diversidade permitirá que os asistentes coñezan e adquiran produtos de gran calidade, promovendo un consumo de produtos de tempada, de proximidade e sostibles".
ACTIVIDADES PARALELAS: DEMOSTRACIÓNS CULINARIAS, OBRADOIROS, DEGUSTACIÓNS E SAÍDAS MICOLÓXICAS
Ademais da venda de produtos, o evento ofrecerá un amplo programa de actividades para todos os públicos. Entre as propostas destacan as demostracións culinarias en directo, obradoiros para nenos e nenas, saídas micolóxicas guiadas para recoñecer cogomelos e degustacións de produtos típicos do outono. Para animar as compras, sortearanse agasallos entre aqueles que realicen adquisicións durante a feira.
No que se refire ás saídas micolóxicas, José Gómez Bragaña, experto do Centro de Investigacións Forestais de Lourizán, liderará un ano máis as saídas ao monte para a recolección de cogomelos, tanto o sábado como o domingo. As persoas interesadas deberán inscribirse previamente enviando un correo a dinamizacioneconomica@allariz.gal, indicando o nome completo, número de teléfono e o día de preferencia.
A hostalería local tamén se implica neste evento, de tal xeito que algúns restaurantes de Allariz ofrecerán menús e tapas especiais con produtos do outono e sortearán unha comida para dúas persoas entre aqueles que participen probando os menús nos establecementos colaboradores.
