“Estas son as marcas que non mesturan con leite de fóra”

Enfrontados aos sindicatos tradicionais e acusados polas centrais de ser un ‘submarino’ do PPdeG no sector, este martes volven a rúa para denunciar que os gandeiros non viron un peso da suba dos bricks nos supermercados. Nesta entrevista o seu voceiro, Roberto López, presume de independencia, explica que marcas debemos mercar para apoiar aos produtores e acusa á Xunta de traballar en favor das industrias. As eleccións autonómicas é outro dos temas desta conversa.

O acordo alcanzado o ano pasado para deter as protestas fixaba que os supermercados subirían o leite nos expositores, para que as industrias trasladaran esta suba ao prezo que lle pagan aos gandeiros.  Até que punto se cumpriu daquela o pactado?

Non se cumpriu. Si que se puido comprobar como a distribución subiu o prezo do leite nos lineais de venta para algunhas marcas, pero os produtores non apreciamos esa suba.  É máis, nos meses seguintes a ditas comunicacións vimos como os prezos caeron e a día de hoxe seguen poñéndonos á firma contratos cos prezos á baixa.

Cada pouco saltan noticias de leite a prezo irrisorios …

Efectivamente, hai empresas de distribución que con frecuencia seguen a usar o leite como produto reclamo, desvalorizándoo e prexudicándonos a nós.

Vostedes convocaron unha nova protesta para hoxe martes, desta volta sen tractores, na Ronda da Muralla de Lugo ante a situación catastrófica do sector. Se a situación non mellora, volverán os tractores a Lugo?

Iso é algo que neste intre non podemos responder, todo dependerá de como sigan as cousas.

Cada vez que se desata unha crise no sector, a Xunta alega que fai o que pode, pero que non ten competencias para intervir nos prezos como demandan os gandeiros.Como valoran o papel de Medio Rural en toda esta crise?

O papel da Consellería do Medio Rural, ó igual que o resto das Administracións, nesta crise é totalmente insuficiente. Díxosenos que se manteñen entrevistas frecuentes cos responsables da industria e da distribución na Consellería, pero o que vemos na práctica é que a finalidade non é axudar ós gandeiros a conseguir un prezo digno polo noso traballo e polo noso produto, senón manter e aumentar os beneficios desas industrias, levando ó peche cada vez a máis granxas.

Vostedes aseguran tamén que levan tempo detrás da Consellería para ter unha reunión na que trasladarlle as súas preocupacións, sen éxito ...

En canto á entrevista coa conselleira, debemos aclarar que tras publicar no noso facebook as queixas, fomos convocados a unha xuntanza con ela. Xuntanza da cal non sacamos nada novo.

Tamén enviaron unha carta aos concellos solicitando bonificacións fiscais. Unha misiva que a maioría dos municipios din vostedes que nin responderon. Os políticos só se acordan dos gandeiros en campaña?

E a veces nin iso. Os concellos teñen na man poder axudar aos gandeiros, por exemplo, aplicando uns tipos impositivos reducidos no IBI, á vista do atraco a man armada do que somos vítimas co “catastrazo”, o cal agrava a presión fiscal e a crise económica que sufrimos as granxas, pero parece que esta non é unha cuestión prioritaria para a maioría deles.

Os detractores de Agromuralla acúsanos a vostedes, malia a súa belixerancia contra a Xunta, de estar próximos ao PPdeG. Argumentan que varios dos seus directivos militaron en Xóvenes Agricultores, o sindicato agrario máis próximo aos conservadores. Teñen algunha base estas acusacións?

Non, esas acusacións non teñen base ningunha. Esa é unha falacia que algúns usan para desacreditar esta Asociación. Nos estatutos reflexouse con total claridade que os representantes da Asociación non poden ter ningún tipo de vinculación con sindicato, partido político ou entidade, da clase que sexa, que poida ter algún tipo de vinculación con calquera deles, control que se fai por trámites internos. Agromuralla é unha asociación absolutamente apolítica.

A comezos de ano vostedes lanzaron a proposta de crear un novo grupo galego de gandeiros que fose capaz de comercializar o leite directamente. Avanzouse algo neste sentido?

Estamos dando pasos, se ben non vai todo o rápido que nos gustaría pois saír cunha nova marca ao mercado é complicado dada a competencia existente.

Que marca de leite lle recomendarían consumir aos galegos que, como consumidores, queren apoiar aos galegos na súa loita? 

A nivel Galicia marcas como Clesa, Feiraco, Deleite e Quintián, só por citar algunhas de leite envasado.  Tamén hai múltiples queixeirías e pequenos negocios familiares de carácter local que se poden atopar por internet como a Casa Grande de Xanceda, Macan ou Prestes. 

Por que estas e non outras?

Porque son marcas que comercializan leite de gandeiros galegos sen que se mesture con leite procedente doutros lugares de fóra de Galicia.

E para quen viva fóra do país e tamén queira apoiar aos gandeiros?

Para os consumidores de fora de Galicia, ademais das anteriores, das cales algunha non se comercializa fóra da nosa Comunidade Autónoma, podemos citar Gaza ou Central Lechera Asturiana, pois son marcas que envasan leite de gandeiros españois, non de fóra. Tamén podemos citar Don Hilario, Lorán, Queixo San Simón, Lacteos Terra de Melide, Queserías Sarrianas, Queserías Daniel Torres Quesería O Brexeo, Anzuxao e Bama.

De seguir así a situación, recomendarán aos seus asociados votar nalgún sentido nas próximas eleccións autonómicas?

Nos non podemos facer iso, nin sería legal -poderiamos estar incorrendo nun delito-  nin sería ético pola nosa parte. Independientemente de que a Asociación sexa apolítica, non cabe dúbida de que cada persoa ten os seus ideais e non é competencia nin obxectivo de Agromuralla influír neles.