Atraca en Baiona (Pontevedra) unha réplica do barco que realizou a primeira volta ao mundo

O porto pesqueiro de Baiona acollerá durante esta fin de semana a unha réplica da nao Victoria, barco que realizou a primeira volta ao mundo e que permanece atracada na localidade pontevedresa dende a mañá deste venres.

A embarcación, que abrirá as súas portas ao público para visitas, é unha réplica do navío que en 1519-1522 realizou a primeira volta ao mundo, unha expedición que por primeira vez conseguía circunnavegar o planeta.

Símbolo dun dos barcos máis emblemáticos da historia da navegación, esta réplica realizou durante os anos 2004-2006 a súa propia volta ao mundo navegando cunha tripulación de 20 persoas a través de máis de 26.000 millas e visitando no seu periplo 17 países.

A Victoria chega a Baiona facendo escala na súa ruta de regreso a España, tras a xira que realizou dende a primavera por diversos países do norte de Europa. Dende o pasado mes de maio, visitou distintos portos de Alemaña, Polonia, Holanda, Inglaterra e Francia.

A nao Victoria partiu o pasado 17 de outubro do porto francés de Nantes e, tras unha travesía de cinco días, arribou a Baiona, onde permanecerá atracada a fin de semana. A continuación, seguirá a súa travesía ata o seu porto base en España, Porto Sherry (Cádiz), onde dará por concluída a súa xira.