Sindicatos de xustiza esperan unha manifestación "masiva" e chaman a ir "de loito" pola "morte" da xustiza

Sindicatos representados no comité de folga dos funcionarios xudiciais, en paro indefinido desde o pasado 7 de febreiro, confían en que Santiago albergará este sábado unha manifestación "masiva" e chaman a acudir "de loito" pola "morte" da xustiza na comunidade "a mans" do presidente da Xunta, Alberto Núñez Feijóo, e do vicepresidente, Alfonso Rueda.

"Por iniciativa dos traballadores, todas as pandeireteiras da xustiza, levade as vosas pandeiretas", apelan os sindicatos, quen contrataron varios autobuses nas distintas cidades galegas e esperan que "miles" de persoas percorran as rúas da capital galega en solidariedade coas demandas dun colectivo de 2.700 funcionarios.

A manifestación sairá ás 12:00 horas da Alameda e continuará pola Rúa da Senra, Praza de Galicia, Doutor Teixeiro, República Arxentina, Rúa do Hórreo, Rúa Nova, Rúa de Xelmírez, Rúa da Conga, e acabará na Praza da Quintana.

Os convocantes piden "un esforzo" de mobilización, "agora máis que nunca", despois do "retroceso" nas negociacións coa Xunta, e as "reiteradas mentiras, enganos e desprezos cara á cidadanía en xeral, e os funcionarios xudiciais en particular". "Non á discriminación laboral na xustiza galega. É o momento de estar xuntos e apertar!", reivindican.

CONFLITO ENQUISTADO

A manifestación prodúcese nun momento no que as posturas das partes parecen máis afastadas que nunca e o conflito está enquistado, tendo en conta que esta semana se produciu unha nova ruptura das negociacións.

Tras dous días de longas reunións, os sindicatos levantáronse ao considerar que a Xunta non ten "vontade real" de negociar. Afirmaron que non se volverán a sentar co director xeral de Función Pública, José María Barreiro, quen encabeza a delegación do Goberno xunto co seu homólogo en Función Pública, Juan José Martín, e esixen un cambio de interlocutor para retomar o diálogo.

PROPOSTAS

A Xunta non parece disposta a ceder ás súas pretensións e afirma que a súa última proposta segue sobre a mesa. Nela, Rueda defendeu que se accede "ao que querían os sindicatos" nas demandas relativas a consolidación de emprego, amortización de prazas e substitución de compañeiros de rango superior.

En canto ás baixas por incapacidade temporal (IT) e a discriminación que denuncia o comité de folga polos descontos, comprométese a trasladar as condicións "máis vantaxosas" que se acorden en Madrid, para traballadores de xustiza e "o resto de empregados públicos galegos".

Sobre a oferta económica, que parece inamovible, tradúcese nunha subida do complemento autonómico transitorio de entre 816 e 1.080 euros ao ano (en función do corpo --auxilios, tramitadores ou xestores--) en dúas anualidades (2019 e 2020). A Xunta defende que este incremento situaría aos funcionarios galegos "por encima da media" do conxunto de comunidades.

En fronte, os sindicatos discrepan de que haxa acordo nos puntos que sinala a Xunta, á que acusan de "manipular táboas e nóminas", e reivindican unha subida lineal de 225 euros ao mes a aplicar en tres anualidades desde 2018. A Xunta sostén que, esta subida de "2.700 euros ao ano" por traballador que suporía son "inasumibles" para as arcas públicas.