O PP agradece a resposta "magnífica" ante o accidente e valora que "milagrosamente" non hai falecidos

O portavoz parlamentario do PPdeG, Pedro Puy, agradeceu a "resposta magnífica" do persoal público que "desde o primeiro momento acudiu a auxiliar" aos accidentados no festival do Marisquiño, así como a da xente que estaba nas inmediacións e "botou unha man".

En rolda de prensa este luns, Puy mandou o seu "apoio" aos feridos neste suceso en Vigo, á vez que destacou os diversos efectivos e medios mobilizados para facer fronte á situación. De tal forma, o portavoz popular valora que "milagrosamente non hai que lamentar perda de vidas humanas".

Un total de 316 persoas foron atendidas polo Servizo Galego de Saúde (Sergas) tras o derrubamento dun tramo do paseo de madeira nunha das dársenas do porto de Vigo, onde se estaba celebrando un concerto con motivo do festival O Marisquiño.