Un estudo detecta unha "carencia de profesionais brutal" en Galicia, onde comercial é o posto máis ofertado

Galicia presenta unha "carencia de profesionais brutal", segundo detecta o informe de Infoempleo e Adecco sobre oferta e demanda de postos de traballo. Ademais, este estudo observa un "desaxuste importantísimo" na comunidade entre o sistema educativo e a realidade empresarial.

Así o destacou o director xeral Infoempleo, Jorge Guelbenzu, quen este xoves presentou o documento xunto á directora de xestión de talento e empleabilidad de grupo Adecco, Iria Vázquez.

En concreto, os postos de traballo que reciben máis ofertas de emprego en Galicia son comercial (6,99%), dependente (3,32%), asesor/promotor (2,31%), operario (1,95%) e técnico de mantemento (1,88%).

A comunidade mantén a sétima posición no ranking de distribución de emprego por comunidades, pero perde o 14% da súa achega, ao pasar de xerar un 4,03% da oferta estatal en 2016 ao 3,43% actual.

En canto ao nivel de especialización, Galicia tamén se sitúa na metade da táboa por autonomías, cun 0,074, por encima de Cataluña, Baleares, Canarias, A Rioxa, Andalucía, Aragón, Estremadura, Comunidade Valenciana e Madrid.

O grao de especialización determínase polo número de sectores que concentran a maior parte da oferta de emprego. Un valor superior a cero indica especialización superior á media mentres que un valor negativo mostra unha maior dispersión sectorial da oferta.

Por provincias, a distribución das ofertas de emprego na comunidade arroxa unha concentración na Coruña (46,32%) e Pontevedra (36,61%), mentres que Ourense (9,67%) e Lugo (7,4%) representan menor porcentaxe.

Mentres, a repartición por sectores sitúa o 10,5% tanto para hostalaría e turismo como para o comercio, un 7,6% en servizos, un 6,2% en alimentación, bebidas e tabaco, un 4,9% para a industria e un 6,62% en construción.

As categorías profesionais máis demandadas son, en primeiro lugar, a de empregados (44%), seguida da de técnico (37%), mando intermedio (16%) e dirección (3%).

Ademais, o 42% dos empregos en Galicia diríxense a titulados universitarios e as máis demandadas son administración de empresas, enxeñaría industrial, ADE e Dereito e Economía.

Jorge Guelbenzu chamou a atención sobre o envellecemento da poboación galega dous puntos por encima da media estatal como outra das características definitorias do mercado laboral da comunidade.

Resaltou tamén o incremento das ofertas que solicitan formación profesional, pois catro de cada 10 ofertas de emprego en Galicia piden contar "como mínimo" con estes estudos.

Por outra banda, indicou que o 0,7% das ofertas son para cubrir unha posición no estranxeiro e que a maioría se dirixe ao continente europeo (74,8%). Así, Gran Bretaña leva o 19,5%, Alemaña o 15,3%, Holanda o 12,2% e Francia o 6,5%.

O salario medio ofertado fóra é de 36.302,72 euros, mentres que as retribucións en xeral ofrecidas durante o último ano deixan a media en 25.053 euros brutos ao ano (49.924 para directivos, 34.679 mandos, 26.303 técnicos e 19.220 empregados).

O FUTURO

Pola súa banda, Iria Vázquez chamou a atención sobre a importancia de "entender o futuro do emprego" que vén, nun marco de automatización e máis uso de tecnoloxías.

Neste escenario, mandou unha mensaxe de tranquilidade, pois estes cambios "van amodo" e, ademais, o emprego "nin se destrúe, nin se crea: transfórmase".