Unha monxa condenada a 21 meses acusada de quedar con 17.500 euros dun convento de Vigo
Os feitos ocorreron cando a relixiosa era administradora do seu convento e quedou con cheques que puxo a seu nome.
Por Europa Press / Redacción | VIGO | 28/11/2018 | Actualizada ás 18:33
A relixiosa A.Y.K. aceptou a pena de 21 meses e un día de prisión por falsificar varios cheques para cobrar e quedar con 17.500 euros da orde relixiosa do mosteiro da Visitación (Salesas) de Vigo. A acusada admitiu os feitos nunha vista de conformidade celebrada este mércores no xulgado do Penal número 1 de Vigo, para evitar ir a prisión, xa que inicialmente a Fiscalía pedía para ela dous anos e medio de cárcere.
Esta monxa foi finalmente condenada a 21 meses e 1 día de prisión por un delito de falsidade documental en concurso cun delito de estafa, e aplícaselle a circunstancia atenuante de recoñecemento dos feitos. Tamén se lle impón unha multa de 1.084 euros.
Ademais, en concepto de responsabilidade civil, a acusada deberá devolver os 17.500 euros á federación de mosteiros á que pertence a orde; así como outros 800 euros a unha farmacéutica á que tamén pediu diñeiro facéndolle crer que era para axudar a outras persoas. O tribunal accedeu á suspensión da execución da pena durante un período de 2 anos, coa condición de que A.Y.K. non delinca nese tempo, e pague polo menos 100 euros ao mes para reparar a súa responsabilidade civil.
FEITOS
Os feitos polos que foi acusada remóntanse a novembro de 2016 cando esta monxa, aproveitando o seu cargo como administradora do convento, fíxose con varios cheques que encheu ao seu nome e cobrou ao longo dos meses, até maio de 2017. En total, cobrou 17.500 euros en diferentes sucursais da cidade de Vigo.
Ademais dese diñeiro, pediu tamén diñeiro a unha farmacéutica, aproveitando a confianza que esta lle tiña, e facéndolle crer que o diñeiro era a orde e para axudar a outras persoas. Deste xeito, logrou que a boticaria lle dera outros 800 euros.
A.Y.K., que foi expulsada da orde, remitiu en xullo de 2017 unha carta á superiora do convento na que admitiu que quedara co diñeiro, pero non explicaba para que o utilizou. Do mesmo xeito, no xuízo celebrado este mércores, non declarou nin se pronunciou respecto do destino do diñeiro.
