O Sergas subministrará a Povisa medicación hospitalaria ambulatoria para pacientes externos

O Servizo Galego de Saúde, Sergas, asumirá a medicación ambulatoria para pacientes externos de Povisa. Este é un dos puntos relativos ao acordo acadado entre representantes do Servizo Galego de Saúde e de Povisa nunha reunión celebrada este mércores. O acordo, concretado en varias medidas “permitirá continuar traballando en facer máis eficiente a execución do concerto e manter as condicións de seguridade e calidade da asistencia sanitaria”, di a Consellería de Sanidade nun comunicado.

Povisa manterá os labores propios do servizo de farmacia hospitalaria no control destes medicamentos. Para tramitar esa prescrición farmacolóxica, “Povisa deberá implantar o sistema SILICON, que é o empregado pola EOXI de Vigo”. Tamén deberá axustarse á guía farmacoterapéutica e protocolos destes produtos “á aprobada pola EOXI e cumprir, na prescrición de medicamentos, os mesmos check-list que se empregan na EOXI de Vigo”.

Outra das medidas acordadas será “deixar de facturar a medicación considerada de alto impacto destes pacientes externos, que se entregará directamente polo Sergas”. Ao respecto da medicación deste tipo administrada antes do acordo, decidiuse o abono polo Sergas da parte da que existe conformidade e “someter ao criterio do Consello consultivo de Galicia as alegacións feitas por parte de Povisa como solución para a parte pendente de tramitación”. 

Ademais do programa de redución de lista de espera (PERLE) para pacientes asignados a Povisa xa realizado neste ano, o acordo “especifica tamén a realización de actividade adicional como a atención a pacientes en lista de espera da EOXI de Vigo”, e a “realización e seguimento de probas complementarias a pacientes que proveñan do programa de cribado de cancro de colon”.

Así mesmo, poderá realizarse facturación de procesos fóra do concerto “como acordar prezos específicos para os servizos que non estean recollidos do Decreto de Tarifas ou aqueles para os que se considere necesario polas súas condicións específicas ou o seu volume”. Tamén quedarán fixados importes máximos para a facturación da asistencia prestada “á poboación de referencia de Povisa nos centros dependentes da EOXI de Vigo”. Ademais, tamén sucederá o mesmo coa facturación emitida por parte de Povisa pola asistencia prestada a pacientes non pertencentes a súa poboación asignada e para as súas unidades de referencia da área.

O financiamento do concerto entre Sergas e Povisa establece un sistema capitativo. Isto farase mediante a “asignación dunha cápita por cada usuario dos que opten por recibir esta asistencia hospitalaria a través do sistema de libre elección que se convoca cunha periodicidade anual”.

Tamén se recolle unha modificación no pago dos servizos. Cada mes aboarase o  100% da doceava parte do concerto, unha vez deducido o importe asignado aos obxectivos de calidade. “Isto é posible xa que actualmente os sistemas informáticos permiten coñecer os datos reais de adscrición dos beneficiarios, calculado sobre o número real de cidadáns asignados”. Ademais, continúase coas regularizacións cuatrimestrais do 10% dacordo co número de Tarxetas Sanitarias dos meses dese período.

Con respecto da docencia e formación sanitaria especializada “o Sergas asumirá os custos dos médicos residentes que se incorporen a Povisa nas prazas e especializades acreditadas neste centro para devandita formación e que se atopen realizando os tres primeiros períodos da súa rotación (R1, R2 e R3)”. Pola súa banda, “corresponderá a Povisa financiar os custes dos que se atopen nos dous últimos períodos (R4 e R5)” ademais de “cubrir as necesidades de docencia previstas na normativa de aplicación e nos plans formativos das especialidades correspondentes, e dos dispositivos hospitalarios da Unidade Docente Multiprofesional de Atención Familiar e Comunitaria de Vigo”.

Acordouse tamén establecer mecanismos de colaboración para “facilitar a posibilidade de Povisa de beneficiarse das condicións económicas na adquisición de produtos” que tamén teña o Sergas a través de procedementos de compra centralizada ou similares. Desde ambas as partes tamén queren que conste “que o acordo recolle o interese do Sergas e Povisa en atopar as solucións que poidan permitir manter o nivel de emprego de Povisa existente en todas as especialidades e servizos, apostando por un emprego estable e de calidade”.

Este interese “que xa ven sendo público e manifesto dende o ano 2006”, en que se formalizou un documento denominado Acordo Básico pola Saúde na Área sanitaria de Vigo entre a Consellería de Sanidade e a dirección de Povisa. Naquel documento tamén participaran representantes das Organización sindicais mais representativas, da confederación de Empresarios de Galicia e da Universidade de Vigo.  No acordo tamén se “recollía a necesidade de manter con Povisa un concerto na súa configuración como hospital xeral con atención integral”.