Darío Campos defende presentar só listas con veciñanza dos propios concellos
O presidente da Deputación de Lugo recoñeceu que "se cadra é difícil" que o PSOE concorra aos comicios do 26 de maio en todos os municipios da provincia
Por E.P. | SANTIAGO DE COMPOSTELA | 19/02/2019 | Actualizada ás 13:56
O presidente da Deputación de Lugo, o socialista Darío Campos Conde, defendeu este martes "non presentar candidaturas" aos concellos nas eleccións do 26 de maio con "xente de fóra" dos municipios.
Xusto antes dun acto no Centro de Artesanía e Deseño (CENTRAD) e interpelado sobre se os socialistas presentarán candidaturas nos 67 concellos da provincia, recoñeceu: "Agora mesmo, se cadra é difícil".
Con todo, si que asegurou que se "tentará" presentar listas do PSOE nos 67 concellos "como si se fixo nos últimos anos". "Eu digo que, ás veces, é mellor non presentar candidaturas se a xente non é de alí que presentar unha candidatura con xente de fóra. Hai que tentalo, se se pode ben e senón non pasa nada", resolveu.
En canto aos dous procesos electorais en marcha -as xerais do 28 de abril e as locais e europeas do 26 de maio-, asegurou que se "afrontan con moito traballo" e agoir "unha época dura de campañas".
"En dous meses temos dúas eleccións importantes. Agora mesmo o traballo está feito e só queda vendelo e seguir traballando, que é o que facemos todos os días. Desde a Deputación, polo menos, estamos a sacar obras para adiante e mellorar a calidade de vida de todos os lucenses. Niso estamos e imos seguir traballando así ata o final da lexislatura", concluíu Campos Conde.
