(Vídeo) O presidente de Ence: "Podemos ter un susto medioambiental maiúsculo en calquera momento"

Toda a ría de Pontevedra e, en particular a cidade de Pontevedra, está en perigo coa factoría de Ence. O propio presidente desta empresa, Ignacio de Colmenares, recoñeceu que pode haber un “susto maiúsculo”. Unha advertencia que causou indiganción xa entre entidades sociais e partidos políticos de Pontevedra que acusan a papeleira de poñer en risco a vida de moita xente.

“Podemos ter un susto maiúsculo medioambiental en calquera momento, que pode afectar, ademais, ás persoas”. Foi a frase literal de Colmenares nun vídeo que remitiu aos traballadores da factoría e no que era moi duro co Goberno central. Así, puxo como excusa a obsolescencia da maquinaria, que segue pendente de recibir os investimentos paralizados desde que en marzo de 2019 o Goberno aceptou o recurso presentado contra a prórroga da concesión polo Concello e a APDR.

O vídeo remitido polo presidente de Ence coincide coa decisión do Ministerio de Transición Ecolóxica de non cambiar o artigo 18.4 da Lei de Cambio Climático e Transición Enerxética, o que afecta a continuidade da empresa  na ría. “Se non o fai procederemos ao peche inminente da fábrica en Pontevedra”, ameazou Colmenares que apunta a Brasil ou Portugal como futuro emprazamento dunha nova fábrica, “pero non en Galicia”.

INVESTIMENTOS PARALIZADOS A POSTA

Pola súa banda, a APDR critica que Ence e o PP “son os únicos responsábeis” da situación actual na fábrica de Lourizán o que levou á empresa a non realizar inversións que afectan á seguridade dos seus traballadores.

Desde a APDR din defender a creación de emprego de calidade, de postos de traballo pero “que non entren en contradición coa calidade de vida, coa defensa do medio e os recursos naturais e cun modelo económico sustentábel no tempo”.
O propio Colmenares recoñeceu que a empresa pode investir 200 millóns até 2023 na factoría de Pontevedra “para reducir custos, reducir a eficiencia de todos os procesos térmicos e mellorar a sostenibilidad de Pontevedra, que quere dicir mellorar o comportamento ambiental e a fiabilidade para non ter sustos”.

Uns investimentos que, curiosamente, é reacio a realizar e que paralizou en 2019 tras a violación ante a Audiencia Nacional na súa decisión sobre a prórroga aprobada polo Goberno de Mariano Rajoy en xaneiro de 2016. “Entón tiñamos en marcha 50 millóns do noso plan de investimentos e executámolos porque non somos uns piratas. Fáltannos os 200 millóns seguintes”, dixo.

“Se nos obrigan a pechar en 2033, temos unha responsabilidade como administradores da compañía. Se non nos deixan horizonte suficiente para investir o que hai que investir e que estamos dispostos a investir, pois nos veremos obrigados a pechar a fábrica de forma ordenada pero rápida”, ameazou.

CONTRA O PSOE

E foi máis alá ao apuntar directamente ao Goberno central e o PSOE. “O Ministerio quere pechar Ence e o PSOE en Galicia tamén, que non vos enganen”, dixo. “Cando di o Goberno, ou o delegado do Goberno en Galicia, que non vai a pechar Ence, eu digo que este artigo é o final de Ence en Pontevedra. Como este artigo salga así, obríganos a pechar de forma inminente”, engadiu

Unhas declaracións incendiarias enviadas aos traballadores para mobilizalos en contra desta decisión e que chegan horas despois de que estes queiran abrir unha mesa de negociación sobre o futuro da factoría en Pontevedra e que coincide tamén co anuncio da Xunta dunha moratoria para o eucalipto en Galicia, aínda que só en novas plantacións, non nas que xa están.

CRÍTICAS DO PSdG

Pola súa banda, e tras facerse público este vídeo, o tenente de alcalde e voceiro do Grupo Municipal do PSOE en Pontevedra, Tino Fernández, amosou hoxe a súa “inmensa preocupación ante as declaracións efectuadas por Colmenares nas que admite que “pode provocar un susto medioambiental maiúsculo en calquera momento”. “Non sabemos o que está a acontecer dentro desa factoría, pero hai que esixirlle á empresa que aclare inmediatamente o alcance desde perigo e á administración competente, que é a Xunta de Galicia, que tome cartas no asunto e abra un expediente inmediato para investigar e coñecer o alcance da situación de perigo que relata o máximo responsable de Ence”, dixo.

O tenente de alcalde de Pontevedra tamén deu a benvida “á realidade, á sensatez e ao sentido común” aos membros do comité de empresa de Ence por apostar, agora, por unha mesa de negociación e diálogo que, lembrou, “foi proposta xa hai dous anos polo Partido Socialista e aceptada polo Goberno do Estado”.  “Nese camiño, os traballadores van atopar ao PSOE e ao Goberno de España. Aí estaremos para sentarnos a dialogar sobre o futuro da empresa, pero cómpre non perder máis tempo de facelo canto antes”, engadiu.

Finalmente,  Tino Fernández lembrou que Ence está disposta a investir 250 millóns de euros e non pode dicir que non hai cartos para facer unha factoría nova. “Ese discurso é falso e está esgotado”, apuntou. Por iso, instou á empresa a deixarse de “cortinas de fume e de buscar argumentos para non falar dun traslado” e a “garantir os postos de traballo e garantir un futuro para Ence na nosa comarca, pero fóra da ría de Pontevedra”.

POSTURA DA APDR

Pola súa banda, a APDR critica que Ence e o PP “son os únicos responsábeis” da situación actual na fábrica de Lourizán o que levou á empresa a non realizar inversións que afectan á seguridade dos seus traballadores.

Desde a APDR din defender a creación de emprego de calidade, de postos de traballo pero “que non entren en contradición coa calidade de vida, coa defensa do medio e os recursos naturais e cun modelo económico sustentábel no tempo”.

RECTIFICACIÓN

Posteriormente, e tras a filtración do vídeo, a empresa remitiu un comunicado no que insiste en que a modificación da actual redacción do citado artigo 18.4 “eliminaría as dúbidas sobre a retroactividade desta norma” e “facilitaría enormemente a situación e o futuro desta planta” e do seu emprego.

Tamén indicou que a empresa xa investiu 132 millóns de euros nesta biofábrica desde que se outorgou a prórroga da concesión, en 2016, e que mantivo contacto institucional co Goberno. Por iso, insiste, quere “reafirmar a súa vontade de solucionar esta cuestión seguindo esa mesma liña de diálogo, mantida até agora, até alcanzar un acordo”.