O sector da verbena mobilízase para pedir á Xunta unha desescalada
A manifestación do sector chega pouco despois de que Sanidade puxera data á apertura das discotecas.
Por Europa Press / Redacción | SANTIAGO DE COMPOSTELA | 28/04/2021 | Actualizada ás 11:52
Un centenar de integrantes do sector de servizos de festas populares e verbenas concentrouse este mércores ante o Parlamento de Galicia para esixir á Xunta que os reciba para acordar unha "desescalada segura" para poder pór en marcha estes eventos e reclamou axudas tras máis dun ano sen poder traballar.
Os representantes deste sector, que se concentraron con pancartas nas que se puido ler 'Primeiro sector parado e abandonado', rexistraron un escrito na Cámara galega a través do que pediron ao presidente da Xunta, Alberto Núñez Feijóo, que "por favor" os "atenda". Así, os presentes criticaron que antes das eleccións autonómicas celebradas o 12 de xullo de 2020, tras a primeira onda da pandemia, si eran recibidos polo Goberno galego. Con todo, censuraron que estes encontros finalizaron unha vez que se celebraron os comicios.
En declaracións aos medios ante o Pazo do Hórreo, o presidente de Serfega, José Veiga, explicou que o sector integra en Galicia a unhas 450 empresas que participan na execución dos festexos e que levan parados desde a declaración do estado de alarma o marzo de 2020.
