Por E.P. | SANTIAGO DE COMPOSTELA | 11/05/2021 | Actualizada ás 20:55
Con motivo do centenario do falecemento da autora galega, a Real Academia Galega (RAG) e a Casa-Museo Emilia Pardo Bazán conmemoran este mércores a vida e obra da escritora cun acto na que especialistas na súa figura compartirán protagonismo con alumnado do CEIP Emilia Pardo Bazán.
O acto comezará ás 11,00 horas no salón de actos da RAG, e concluirá coa entrega dos premios do I Certame de relato breve 'A Erbeda', organizado pola asociación de veciños 'As nosas lareiras, de Palavea, coa colaboración da Academia. Nun comunicado, a RAG anuncia que o acto consistirá nunha lectura colectiva de textos cos que "pretenden mostrar a variedade de rexistros que Emilia Pardo Bazán cultivou ao longo da súa vida.
A conmemoración contará coa participación do presidente da Real Academia Galega, Víctor F. Freixanes, o concelleiro da Coruña José Mnauel Lage Tuñas, a académica Marilar Aleixandre, a conservadora da Casa-Museo, Xulia Santiso, o editor Eduardo Riestra, a profesora da Universidade da Coruña especialista en estudos de xénero, Antía Pérez Caramés, e a profesora do IES Otero Pedrayo, Begoña Valdés Rodríguez.
Ademais deste acto, tanto a RAG como Casa-Museo deseñaron unha programación especial que se estenderá ao longo de todo o ano e que terá como actividade central a celebración do Congreso Internacional Emilia Pardo Bazán a finais de outubro, coincidindo coa chegada A Coruña da exposición 'Emilia Pardo Bazán. O reto da modernidade'.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.