O Congreso garda un minuto de silencio en memoria de Valeriano Martínez

A Xunta comunicou oficialmente no seu perfil da rede social de Twitter o falecemento do conselleiro de Facenda, Valeriano Martínez, á vez que trasladou "o maior dos abrazos" a todos os seres queridos "dun traballador público que sempre estivo ao servizo do pobo de Galicia".

"Hoxe Galicia perde a un servidor público exemplar. Nós, a un dos nosos", sinala a familia do PP nunha mensaxe na súa rede de Twitter. Así, o PPdeG significou que Valeriano Martínez "deixa un importante legado político pero, sobre todo, un gran baleiro persoal".

Tamén o delegado do Goberno en Galicia, José Miñones, expresou nesta rede social as súas condolencias polo falecemento do conselleiro de Facenda, que dirixiu, en nome do Executivo que dirixe Pedro Sánchez, á Xunta. Á familia e amigos de Martínez, trasladoulles "todo o seu agarimo".

Do Goberno central tamén se pronunciou a ministra de Traballo, Yolanda Díaz. "Con profunda consternación coñecemos hoxe o falecemento do conselleiro de Facenda. Dicímoslle adeus a un home dialogante, exemplar na súa entrega ao servizo público. O meu pesar á súa familia e achegados, e aos seus compañeiros do PP de Galicia", conclúe.

O CONGRESO GARDA UN MINUTO DE SILENCIO

A Comisión de Asuntos Económicos do Congreso e a vicepresidenta Nadia Calviño gardaron este mércores un minuto de silencio en memoria do conselleiro de Facenda da Xunta de Galicia, Valeriano Martínez, falecido no seu despacho mentres traballaba.

A iniciativa partiu do presidente da comisión, o deputado galego do PP Celso Delgado, quen comunicou a "triste noticia" aos parlamentarios e destacou que o conselleiro era "un servidor público" coñecido por todos polo seu labor á fronte de Facenda desde 2015.

Celso Delgado pediu entón un minuto de silencio ao comezo da comisión e todos os deputados presentes, incluíndo a vicepresidenta Calviño, que estaba citada a comparecer, púxose en pé e renderon homenaxe ao falecido.

BNG E PSDEG

Os partidos políticos galegos expresaron o seu pesar e condolencias pola morte repentina do conselleiro de Facenda, Valeriano Martínez, cando se atopaba no seu despacho do edificio administrativo de San Caetano.

O BNG expresou o seu pésame polo deceso e trasladou as condolencias á súa familia e seres queridos, así como ao PP galego. "As miñas condolencias á familia e amizades de Valeriano Martínez, nun momento de conmoción e tristeza compartida. Un abrazo tamén á súa familia política, ao PP, que vive hoxe un día de loito", manifestou a portavoz nacional do Bloque, Ana Pontón, na súa conta persoal.

O secretario xeral do PSdeG, Gonzalo Caballero, mostrouse, tamén na súa conta de Twitter, "conmocionado e triste polo inesperado falecemento" do conselleiro. "O meu máis sentido pésame á súa familia, ao Goberno de Galicia e a todo o PP", expresou.

PESAR DE CONCELLOS E FEGAMP

En clave institucional, o alcalde de Santiago, Xosé Sánchez Bugallo, e os membros da Corporación Municipal, tamén mostraron a súa máis sentido pésame polo falecemento de Valeriano Martínez. En sinal de duelo, ademais, informou de que o Ayuntamietno e a Real Academia Galega de Belas Artes acordaron suspender o acto conmemorativo do Día das Artes Galegas 2020-2021, que tiñan previsto celebrar ás 19,00 horas, no Hostal dos Reis Católicos.

O alcalde de Vigo, Abel Caballero, tamén trasladou o seu "máis profundo pésame e agarimo" á familia de Martínez; do mesmo xeito que a Federación Galega de Municipios e Provincias (Fegamp).