A sanidade galega "colapsada"; médicos contaxiados, falta de persoal e as urxencias desbordadas

"Colapsados", "desbodados", "exhaustos"... Así din sentirse os sanitarios que estes días non dan a basto coa repunta de casos e a falta, din, de previsión por parte do Sergas para facer fronte a unha nova vaga, a sexta, que está deixando cifras récord de contaxios, pero tamén, de desorganización nas institucións sanitarias e no sistema de rastreo.

Unha situación que tamén está desbordando á atención primaria. Fontes sanitarias apuntan de que só en Ribeira  este 28 de decembro houbo 414 positivos. O propio conselleiro de Sanidade, Julio García Comesaña recoñecía unha "situación difícil" dos centros de atención primaria e destacaba que o Sergas vaise volcar en poñer medios a estes centros.

A covid tamén está pasando factura aos propios profesionais da sanidade. O persoal xa mostra sintomas de esgotamento, pola falta de dias de libre disposición e vacacións, a imposibilidade de contratacións e o contaxio de moito do persoal sanitario nas distintas áreas.

Para aliviar esta tensión hospitalaria, o conselleiro de Sanidade, Julio García Comesaña, avanzaba este martes que unha das medidas que se planifican para o desconxestionamento da atención primaria ante o aumento "explosivo" dos casos positivos sexa a validación do test que se realizan en domicilios, sen que se necesite a PCR de validación.

"Con este ritmo de contaxios, desde a Xunta temos que prever repercusións e tomar medidas, porque pode levar ao sistema público a un risco en dúas vertentes asistenciais, que poderían resentir a saúde colectiva, por unha banda a presión asistencial e, por outro, a atención primaria", apuntou o conselleiro de Sanidade. Por iso, pediulle á poboación que evite desprazamentos aos centros de saúde se teñen síntomas e o de tratar desconxestionar a atención primaria.

PROBLEMAS EN DISTINTOS HOSPITAIS

A situación nas áreas sanitarias da Coruña, Ourense, Vigo, Pontevedra e Santiago "é mala". De feito, no Complexo Hospitalario Universitario de Pontevedra  "hai unha chea de positivos" entre os propios sanitarios. "Non podemos cubrir as gardas", din fontes sanitarias a GC.  Tamén no Complexo Hospitalario Universitario da Coruña  (CHUAC) denuncian que a Xerencia non contrata máis profesionais e a plantilla é insuficiente para atender á xente. "Non lles deixan librar nin descansar e non contratan descubertos para garantir a adecuada atención dos doentes", denuncia.

Tal é a situación de colapso e caos que o persoal sanitario do CHUAC anuncia unha folga este xoves, iniciando a súa protesta cunha marcha na porta de urxencias deste hospital para denunciar a "incompetencia" da Xunta. De feito, piden a comprensión e a axuda da cidadanía nestes duros momentos. "Somos os mesmos que loitaron por ti nesta pandemia sen medios e sen descanso", lembran.

"COLAPSO"

"A situación é desbordante e case colapso nalgunhas zonas", apunta un médico consultado por GC que suliña que nalgunhas áreas empézase a acusar a "falta de persoal" pola necesidade que Sanidade ten por manter a situación de control nos hospitais Así, lembra que na área Sanitaria da Coruña estanse denegando permisos e vacacións a moitos sanitarios e en atención primaria, os centro de saúde que só tiñan horario de mañá, agora tamén atenden polas tardes.

"Nalgúns Hospitais como en Vigo e en Pontevedra, empezan a suspenderse novamente as cirurxías comúns e ordinarias", destaca ao suliñar que a falta de persoal é evidente e a de poder contratar "aínda máis".

Tal é a situación de colapso que o propio Goberno Central lanzou na última reunión mantida cos membros da Xunta Interterritorial a posibilidade de contratar médicos extracomunitarios. Unha situaicón que rexeitan os distintos colexios médicos a traves dos seus onsellos territoriais porque consideran que isto non é unha garantía para a saúde e a vida das persoas e para o actual sistema sanitario.

O PEOR ESTÁ POR CHEGAR

"Días atrás víñase falando de que estabamos afrontando o pico da pandemia e non é certo, porque o peor espérase para despues destas datas, probablemente para mediados do mes de xaneiro, o que aínda empeora a situación do mapa sanitario galego, sen que ninguén ofreza solucións respecto diso", apuntan fontes sanitarias consultadas. 

Así, destacan que a vacina non é a "panacea", axuda a que a situación non sexa tan grave pero lembran que a nova variante é máis expansiva e máis agresiva no contaxio e que segue sen ofrecer calma entre as propias autoridades sanitarias.