Por Europa Press / Redacción | SANTIAGO DE COMPOSTELA | 16/06/2023 | Actualizada ás 13:44
O BNG acusou á Xunta de evitar "o debate" parlamentario ao redor da lei do litoral pola decisión do PP de solicitar a tramitación do texto pola vía de urxencia, motivo polo que o PSdeG xustificou que retira o seu apoio á nova normativa.
Os grupos da oposición censuraron este venres a decisión da formación que sustenta o Goberno galego de solicitar a tramitación pola vía de urxencia deste texto, o que reduce á metade os tempos para o debate e aprobación da lei.
Nunha rolda de prensa, as deputadas nacionalistas Alexandra Fernández e Rosana Pérez aseveraron que os populares queren "coartar" as funcións da Cámara co que consideran "un novo ataque aos principios democráticos e representativos" do lexislativo.
A decisión tamén foi criticada polos socialistas a través dunha nota de prensa na que o seu portavoz parlamentario, Luís Álvarez, anunciou que non apoiarán a lei á que se comprometeu a votar 'si' o secretario xeral do PSdeG, Valentín González Formos. Para os socialistas, o PP modificou o proceso de tramitación do texto "pola porta de atrás" para "entorpecer" o debate da lei. "Nin compartimos nin entendemos a repentina urxencia do PP e da que carecía no momento no que o texto foi presentado", apostilou Álvarez.
BNG: "É UN ESCÁNDALO"
Pola súa banda, o Bloque cualificou de "escándalo" que o PP decida dar este paso que non ven sustentado "en ningunha cuestión obxectiva que o xustifique" máis aló do "puro electoralismo" para empregar esta lei como obxecto de "confrontación política".
De feito, Alexandra Fernández afirmou que "as présas" da Xunta provocaron mesmo as queixas do Consello Económico e Social por ser aprobado o texto da lei en Consello sen contar co "informe preceptivo" da entidade que preside Agustín Hernández.
"Como de grave debe ser para que o exconselleiro de Medio Ambiente (Agustín Hernández) remita unha queixa formal á Xunta", engadiu a parlamentaria frontista, que afirmou que esta carta do CES provocou a "reacción" do PP de empregar, "catro días máis tarde", a súa maioría na Mesa do Parlamento para solicitar a tramitacion por vía de urxencia.
PSDEG: "NINGUNEA A SOBERANÍA POPULAR"
Polo seu lado, o PSdeG ve no cambio de forma de tramitar a lei un "ninguneo" do PP "á soberanía popular" que reside na Cámara autónomica, dado que "secuestra" o debate parlamentario e "limita" a súa capacidade lexislativa.
Por tanto, rectifican e anuncian que non apoiarán o texto porque, segundo Luís Álvarez, o seu 'si' estaba vinculado a que se desenvolvese "un debate de fondo que permitiría garantir a seguridade xurídica".
PP: "DISPOSICIÓN" A NEGOCIAR
Tras coñecerse as críticas da oposición, o Grupo Popular emitiu un comunicado no que, a través do seu viceportavoz Alberto Pazos; manifesta a súa "plena disposición" a negociar o texto lexislativo para que "sexa cal for a cor" do Goberno que salga das eleccións do 23 de xullo "esta nova norma xa estea operativa e poida pór en marcha o traspaso dos medios necesarios para o seu desenvolvemento".
"O Grupo Popular está aberto a dialogar e negociar cos grupos da oposición calquera cuestión que consideren oportuna e que crean que pode mellorar esta nova lei", incidiu Couñago, que afirmou que o seu grupo "aínda está á espera" de que BNG e PSdeG "se comuníquen" para concertar unha cita para coñecer as súas respostas.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.