Rueda, disposto a "plantarse" ante compañeiros do PP se Sánchez tamén lles condona a débeda

O presidente da Xunta, Alfonso Rueda, dá un paso máis e, co debate aberto ao redor dunha posible condonación da débeda a algunhas comunidades e á reforma do sistema de financiamento autonómico, advertiu de que está disposto a "plantarse" ante quen faga falta en defensa dun trato xusto para Galicia. Esta premisa inclúe ao socialista Pedro Sánchez, pero tamén a outros populares se é necesario.

Nunha entrevista concedida a Europa Press, o tamén líder do PP galego, quen non pecha a porta á vía xudicial aínda que por agora prefira explorar o camiño político e reivindica que calquera modificación do modelo de financiamento se acorde "entre todos" no seo do Consello de Política Fiscal e Financeira (CPFF), mostrouse moi contundente e lanzou un aviso: "Nisto vou ser moi firme".

Rueda censurou calquera negociación bilateral que poida ter Sánchez para tratar de facilitarse unha investidura, pero tamén apuntou ao seu propio partido, despois de que dirixentes como o presidente valenciano, Carlos Mazón, esixise unha "compensación" da débeda para a súa comunidade. O presidente galego mantén que o diálogo debe ser entre todos, con "cesións" de todas as partes, e rexeita frontalmente calquera vía que prexudique a Galicia.

"Eu nisto vou ser moi firme e espero que todo o mundo sexa coherente. Se compañeiros ou compañeiras miñas, presidentes de comunidades, aínda que sexan do meu partido, non están con esta formulación, a Galicia vana a ter enfronte", advertiu.

"Non teño ningunha dúbida de que, por moi mal que collesen os seus gobernos autonómicos algúns compañeiros meus, que os colleron cunha débeda moi grande, e por moitas urxencias que teñan en solucionalo, isto non se pode expor de forma bilateral, nin asimétrica, nin con inxustizas. É un erro. Espero que non, porque creo que é xente razoable, pero non tería problema en plantarme e dicirlles que non teñen razón, aínda que sexan do PP", agregou.

O presidente da Xunta, Alfonso Rueda, durante a entrevista, no seu despacho da Xunta | Fonte: César Argina