A alcaldesa de Santiago defende a "transparencia" do seu proxecto para a Casa da Xuventude e pide calma ao PP
"Non hai ningunha falta de transparencia nin falta de diálogo. Este tema debateuse ata a saciedade durante a campaña", apuntou Goretti Sanmartín.
Por E.P. | SANTIAGO DE COMPOSTELA | 01/12/2023 | Actualizada ás 18:58
A alcaldesa de Santiago, Goretti Sanmartín, insistiu na "transparencia" do seu proxecto para a Casa da Xuventude, despois de que o socialista Aitor Bouza instase este venres ao Executivo local a aclarar se existe unha renuncia formal ao convenio coa Deputación da Coruña.
"Non hai ningunha falta de transparencia nin falta de diálogo. Este tema debateuse ata a saciedade durante a campaña. Podemos dicir que hai outros temas que a xente non soubese o que pensaba esa forza política, pero sobre este tema toda a poboación sabe o que pensa cada unha das organizacións", defendeu.
Así, Goretti Sanmartín reiterou que "a ninguén se lle oculta" que lle trasladaron ao presidente da institución provincial que a súa idea "non era asinar ese convenio", porque entendía que "aquel lugar non é o máis adecuado para ter oficinas administrativas da Deputación",
A alcaldesa da capital galega espera que sexa un espazo con "máis presenza peonil", algo que, insistiu, trasladáronlle á Deputación e propuxéronlle "outras alternativas".
O PP PIDE A DIMISIÓN DE ROZAS
Á súa vez, pediu ao portavoz do PP, Borja Verea, "tranquilidade" e defendeu que o Goberno municipal está "unido e cohesionado". "Neste goberno non vai dimitir ninguén; aquí hai un goberno unido e cohesionado que entra dentro da normalidade máis democrática", sinalou.
Así respondía a rexedora compostelá a Verea, que se mostrou "disposto a negociar" co goberno de BNG e Compostela Aberta o derrube da Casa da Xuventude, pero, lembrou, "María Rozas (CA) prometeu que se ela tiña responsabilidades de goberno nunca permitiría o derrube".
"Por tanto, ou dimite, no caso de que o BNG siga adiante co derrube do inmoble, ou terá que asumir a decisión do BNG", expresou. Ante estas declaracións, a preguntas dos medios, Goretti Sanmartín explicou que dentro do goberno ponse "de acordo no 99%" dos asuntos, con "unha discrepancia que non ten maior repercusión" e que "non vai significar ningún cambio dentro do propio goberno".
"Sabemos o que pensa cada organización política e miraremos como se van a concretar cada unha das cuestións", lembrou, antes de pedir ao portavoz popular "tranquilidade", porque o goberno local está "unido e cohesionado" e "vai seguir gobernando". "Rozas está a facer un grandísimo traballo e vaino a seguir facendo", resolveu.
