Ence anuncia unha gran planta de reciclaxe téxtil na antiga central térmica das Pontes

Ence proxecta xunto á empresa emerxente sueca ShareTex a creación dunha planta de reciclaxe téxtil no recinto da central térmica das Pontes. Segundo explica a compañía nun comunicado remitido aos medios este martes, trátase dunha iniciativa que se encadra no proxecto de planta de reciclaxe de Ence nas Pontes.

Sinala que a instalación "non empregará madeira, senón fibras recuperadas" e que "se autoabastecerá de enerxía renovable e terá un consumo mínimo de auga". Para a xestión dos residuos téxtiles empregará "unha nova tecnoloxía" que xa foi testada a escala de laboratorio coa que se pretende mellorar a sustentabilidade deste tipo de actividades.

Neste sentido, apunta como "vantaxes" da "nova tecnoloxía" a capacidade de procesado dos téxtiles de poli-algodón que "amplía a gama" de elementos susceptibles de ser reciclados a través dunha técnica "que non precisa de condicións drásticas de presión nin de temperatura, nin tampouco emprega disolventes tóxicos". Ence afirma que o proceso usará residuos post-consumo "colleitados" en Galicia para obter fibras téxtiles de cara á súa reintegración na cadea de valor "ou en procesos de alto valor engadido".

APLICACIÓN DA NOVA METODOLOXÍA DE ACTUALIZACIÓN DA RETRIBUCIÓN

Ence Enerxía e Celulosa estima que a aplicación da nova metodoloxía de actualización da retribución á operación das plantas de xeración eléctrica con biomasa terá un impacto positivo de ata 62 millóns de euros na xeración de caixa de 2024 (en función da enerxía finalmente producida no exercicio) respecto da que xerase coa regulación anterior, informou a compañía. En concreto, esta regulación aplicarase desde o 1 de xaneiro de 2024, con efectos retroactivos, tanto desde o punto de vista contable como de caixa.

Así, desde o punto de vista contable, como consecuencia da facturación do prezo regulado en función das horas efectivamente xeradas (en lugar das 7.500 horas teóricas da regulación anterior), a súa aplicación suporá un axuste á baixa dos ingresos por un importe estimado de nove millóns de euros no primeiro trimestre de 2024, que se reflectirá nos resultados do segundo trimestre, sinalou a empresa.

O Ministerio para a Transición Ecolóxica e Reto Demográfico aprobou a nova metodoloxía de actualización da retribución á operación (Ro) das plantas de xeración eléctrica con biomasa. O grupo papeleiro e enerxético indicou que esta nova metodoloxía, que mellora a xeración de caixa da compañía no ano e alíñaa co resultado contable, "evidencia a firme aposta do Ministerio para a Transición Ecolóxica pola enerxía renovables e, en especial, pola biomasa".