O BNG urxe á Xunta reformular o sistema de financiamento aos concellos e "deixar de facer oposición" a Santiago

A portavoz nacional do BNG, Ana Pontón, reclamou á Xunta que avance na configuración dun novo sistema de financiamento aos concellos que "termine coa discriminación" e a "discrecionalidade" na repartición de fondos para as administracións locais. A formación frontista reuniu este venres en Santiago ao seu órgano de coordinación dos municipios onde está presente nos gobernos para facer balance do primeiro ano do mandato, no que Pontón considera que quedou "demostrado" que o "modelo BNG" nos concellos reflicte que son "a forza con capacidade para transformar o país" a través de políticas "valentes, vangardistas, transformadoras, pensadas por e para Galicia e que pon ás persoas no centro".

Acompañada por rexedores e tenentes de alcalde coa primeira edil de Santiago, Goretti Sanmartín, e o seu homólogo pontevedrés, Miguel Anxo Fernández Lores, á cabeza; Pontón reivindicou que o poder local do Bloque mostra "que hai outra forma de facer política" para construír "outra Galicia". Fronte ao "descrédito", a líder frontista aseverou que "a política é a solución e non o problema" cando se exerce desde unha perspectiva "construtiva" e de "ideas" como, di, fai o Bloque nos lugares onde ten responsabilidades de goberno.

Así, incidiu en que, nun momento de "grandes cambios" que expoñen "grandes desafíos", os gobernos do BNG van na liña de apostar polo "reforzo" dos servizos públicos, medidas para enfrontar a emerxencia climática e "a defensa" dos recursos naturais e patrimoniais, "eliminar os privilexios e amiguismos" na administración, "recuperar" o espazo público para a cidadanía ou "o impulso" da lingua galega e a cultura.

"OPOSICIÓN" DA XUNTA A SANTIAGO

Neste sentido, puxo como exemplo ao goberno de Santiago por abrir debates sobre a regulación das vivendas turísticas, un asunto no que afeou a "política de brazos caídos" da Xunta á hora de garantir un dereito que se converteu "para miles de mozos nun artigo de luxo sen que o Goberno galego fixese nada". A continuación, Pontón dirixiu un "consello" ao presidente da Xunta, Alfonso Rueda, ao que pediu que empregue "todos eses esforzos que dedica a facer oposición" ao goberno compostelán de Goretti Sanmartín en "facer efectivo o dereito á vivenda".

Ademais de enxalzar a traxectoria de gobernos máis veteranos do BNG como o de Pontevedra ou Carballo, a líder frontista puxo como "exemplo" do "modelo BNG" ás Alcaldías de Cangas, por "facer algo revolucionario, como devolver a normalidade" ao municipio do Morrazo ou a defensa "dos recursos e o patrimonio" das adminstracións en Arzúa e Santiso pola súa oposición ao proxecto de Altri.

"FALTA DE RECURSOS"

Segundo Pontón, os concellos poñen en marcha estas medidas "moitas veces tirando de imaxinación" ante a "falta de recursos que sofren" por un sistema de financiamento "moi deficitario" e que os "discrimina" ao facer que, por exemplo, Santiago ou Pontevedra reciban "50 euros menos" por veciño que cidades "como Madrid ou Barcelona". A iso sumou a "discrecionalidade" coa que, di, reparte os fondos públicos a Xunta, que "premia" aos municipios gobernados polo PP cun uso "moi pouco democrático" dos fondos "que ten que transferir aos concellos".

Por tanto, Ana Pontón subliñou que o BNG se vai "a mollar" no debate do modelo de financiamento das administracións locais para que os recursos se xestionen "con transparencia" e "garantan a igualdade de trato, goberne quen goberne". Así as cousas, a líder frontista reivindicou que o primeiro ano do mandato que se prolongará ata 2027 "é só o inicio" porque demostra que o BNG "é unha forza que transforma este país" e constitúe "a esperanza" para Galicia.

GORETTI SANMARTÍN

Antes, a encargada de dar paso ás palabras de Pontón foi a rexedora compostelá, que tamén puxo o acento en que se pode "cambiar" Galicia "desde os concellos" con políticas "valentes" e pensadas "a medio e longo prazo". Transcorrido un ano desde a súa chegada ao Pazo de Raxoi, a alcaldesa subliñou que as "estratexias" do seu goberno pasan por apostar por un modelo urbano "que pense na habitabilidade e a mellora das condicións das persoas" a través de medidas enfocadas á vivenda, a protección do comercio ou a mellora de servizos públicos. Todo iso coa perspectiva de que é necesaria unha "diversificación" da actividade económica para que "non se fíe todo a unha ou dúas actividades" que, no caso de Santiago, fan preciso "ir máis aló" do turismo e o sector servizo para desenvolver a industria e outros negocios.

A portavoz nacional do BNG, Ana Pontón, xunto ás alcaldesas, alcaldesas e cargos locais do BNG nunha foto de familia na Praza do Obradoiro | Fonte: BNG