Pontón cre que Baltar debería dimitir como senador tras a apertura de xuízo oral polo Supremo: "É indigno"
Rueda, sobre o xuízo ao senador Baltar e a súa posible dimisión: "Imos esperar ao seu resultado"
Por Europa Press / Redacción | Santiago de Compostela | 12/07/2024 | Actualizada ás 19:31
A portavoz nacional do BNG, Ana Pontón, ve claro que o popular Manuel Baltar "debería dimitir" como senador por designación do Parlamento galego despois de que o Tribunal Supremo ditase auto de apertura de xuízo oral contra el por un delito contra a seguridade viaria, por presuntamente conducir un coche oficial a 215 quilómetros por hora cando era presidente da Deputación de Ourense.
"É unha cuestión de dignidade e é indigno que unha persoa nesa posición ocupe o cargo de senador por designación autonómica", subliñou a líder do Bloque, ao ser preguntada respecto diso este venres.
De feito, Ana Pontón lembrou que os nacionalistas dixeron "desde o primeiro momento" que era "indigno" que Baltar accedese a ese cargo nunha votación no Parlamento galego celebrada o verán pasado, cando xa estaba inmerso no proceso xudicial por un suposto delito contra a seguridade viaria.
RUEDA SOBRE O XUÍZO
O presidente da Xunta, Alfonso Rueda, apelou á "xustiza" e á celebración do xuízo ao senador do PP José Manuel Baltar por un delito contra a seguridade viaria para valorar a súa posible dimisión. "Imos esperar o seu resultado", dixo. Fíxoo a preguntas dos xornalistas sobre este asunto, nun acto na Coruña, tras a decisión da xuíza instrutora de ditar o auto de apertura de xuízo oral contra Baltar por presuntamente conducir un coche a 215 quilómetros por hora na autovía A-52 nun tramo en que a velocidade máxima era de 120.
"Confío na xustiza", recalcou Rueda para explicar que "Baltar o que está a facer é o que ten que facer calquera persoa se está inmersa nun proceso xudicial, someterse a ese procedemento e esperar ao seu resultado". Neste sentido, o líder do PP galego criticou "a actitude doutros responsables que cando non lles gusta unha situación xudicial descualifican aos xuíces". "Cremos na democracia e na separación de poderes", apostilou.
A FISCALÍA
A Fiscalía do Tribunal Supremo solicitou que se lle prive de conducir vehículos a motor durante un ano e un día, ademais do pago dunha multa de 1.800 euros, ao senador do PP José Manuel Baltar por un delito contra a seguridade viaria, por presuntamente conducir un coche a 215 quilómetros por hora na autovía A-52 nun tramo no que a velocidade máxima era 120 quilómetros por hora. Así consta no escrito de acusación do Ministerio Público, ao que tivo acceso Europa Press, no que se pide que durante a vista oral deberán comparezan, ademais de Baltar como acusado, os gardas civís de Tráfico que realizaban o control de velocidade nesa estrada.
BALTAR NEGA OS FEITOS
Ferrer actúa contra Baltar tendo en conta que o Senado aprobou o suplicatorio e de que este xa compareceu voluntariamente ante o Supremo o pasado 19 de decembro para negar que conducise a esa velocidade. "Non existiu en ningún momento unha velocidade superior a 200 quilómetros por hora", dixo o seu avogado, Ramón Montero, en declaracións á prensa.
