Defensa da Sanidade Pública reclama que o Parlamento investigue os contratos da Xunta con Eulen

A Asociación Galega para a Defensa da Sanidade Pública reclamou a creación dunha comisión de investigación no Parlamento galego sobre os contratos da Xunta coa compañía Eulen, que tamén avoga por que sexan perseguidos por vía xudicial.

Nun comunicado, a plataforma acusou ao Goberno galego de outorgar contratos por valor de máis 50 millóns de euros entre as etapas de Alberto Núñez Feijóo e o seu sucesor, Alfonso Rueda, á fronte da Xunta de Galicia.

Tamén asegura que a xestión das 50 residencias sanitarias públicas foi cedida a Eulen, que ten como responsable da zona norte a Micaela Núñez, irmá do actual líder do PP a nivel estatal durante os anos deste como presidente galego. A iso, engade que na pandemia a liña telefónica de información sobre o covid foi asignada a Universal Support, unha empresa "sen vinculación" co sector sanitario e na que figura como director comercial "o cuñado" de Feijóo.

"Núñez Feijóo, como outros moitos políticos neoliberais, non ten ningún interese na sanidade pública, xa que como paciente utiliza a sanidade privada cando ten problemas de saúde, como na súa recente intervención por desprendemento de retina", asevera o colectivo. Por tanto, considera que "tanto a xustiza como o Parlamento" deberían investigar e "esixir responsabilidades" sobre esta forma de proceder desde a Administración pública.

Sede da empresa Eulen no polígono da Grela (A Coruña) | Fonte: Google Maps.