O Goberno galego abre a porta a convocar novas oposicións en educación

O conselleiro de Cultura, Educación e Ordenación Universitaria, Román Rodríguez, deixou a porta aberta este domingo a que o seu departamento convoque unha nova oferta pública de emprego (OPE) para docentes. Aínda que admitiu que "é moi pronto aínda" para anuncialo, dixo que será "en datas semellantes e, se son capaces de negociar coas organizacións sindicais, incrementarán, mesmo, a propia oferta", que neste ano superou as 2.000 prazas.

Así o declarou nunha entrevista á Cadena Ser recollida por Europa Press, na que lembrou que a última OPE, que se desenvolveu no mes de xuño, foi "a segunda máis grande da historia" de Galicia. "Sen aventurar datos, estaremos nesas cifras, algo por arriba, e esperemos que nada por baixo", previu, en referencia a unha posible futura convocatoria.

En este mesmo contexto, Rodríguez foi preguntado sobre as críticas da CIG respecto do novo curso escolar que comeza este mes, ao que o conselleiro respondeu que a central nacionalista "practicamente di o mesmo" cada ano. De igual modo, criticou que a CIG foi unha das organizacións que non asinou o convenio de incremento salarial de 90 euros para os docentes galegos non universitarios --convenio ratificado por CC.OO. e UXT--.

"Se lle fixésemos caso ás descualificacións que se lanzan aos que temos responsabilidades políticas, estariamos tristes e desencaixados, pero as cousas hai que tomalas de quen veñen", proseguiu.

IES DE BRIÓN

Rodríguez tamén falou sobre a problemática do IES de Brión (A Coruña) no que a dirección dimitiu e os pais encerráronse no centro para reclamar máis profesorado. O conselleiro reduciu este caso a un problema "concreto" que "sempre xorde" co inicio do curso: "Se o comparamos co conxunto do sistema educativo, que son máis de 1.000 centros, son cuestións puntuais".

Neste sentido, o mandatario insistiu en que os inspectores que revisaron a situación "non toman medidas arbitrarias", senón que adoptan solucións baseadas en criterios "moi serios, moi sólidos e moi definidos".

PROHIBICIÓN DOS MÓBILES NOS CENTROS

Sobre o debate aberto polo Goberno central ao redor da prohibición do uso dos teléfonos móbiles nos colexios, Rodríguez opinou que a palabra prohibir, "en principio, sempre soa mal". "Os móbiles, queiramos ou non, están moi instalados nas nosas vidas, quizais demasiado pronto, porque os nenos de 13 ou 14 anos xa empezan a andar con eles porque as familias llos compran", explicou.

Así pois, o conselleiro de Educación valora aos 'smartphone' como unha "ferramenta pedagóxica" que pode ser "moi interesante" baixo a supervisión do profesorado.

No entanto, esgrimiu que o Ministerio de Educación "vai por detrás" da Xunta neste asunto, cando desde a Administración autonómica, continuou, "xa se abordou hai un tempo" e xa o resolveron "dunha forma satisfactoria". "Agora parece que o Ministerio descobre a pólvora, (...) pero en moitas Comunidades Autónomas, como esta, é un debate que temos canalizado e resolto", asegurou.

'CASO MÁSTER' E A TESE DE SÁNCHEZ

Preguntado sobre a polémica do 'caso Máster' e da tese doutoral do presidente do Goberno, Pedro Sánchez, Rodríguez lamentou que todo iso vaia "en detrimento do prestixio" da educación superior.

Así, o conselleiro mostrouse "seguro" de que os mecanismos de control nas universidades públicas galegas "imposibilitan" que pase algo similar na Comunidade. En todo caso, "se unha universidade pública ou privada non fai ben o seu traballo, terá que explicar por que e como lle meten eses goles", suxeriu.

"É lamentable que pasen estas cuestións porque xeran unha gran desconfianza. Eu son doutor, fixen a miña tese hai xa 25 anos. (...) Convido a que todas as persoas vaian lela, está gardada no sistema daquel momento, en microfichas que están depositadas na universidade, ou os dous libros que foron editados", resolveu Rodríguez.

PAZO DE MEIRÁS

O conselleiro tamén subliñou a postura "firme" da Xunta coa devolución ao patrimonio público do Pazo de Meirás de Sada (A Coruña), actualmente en mans da familia do ditador Francisco Franco, un asunto que, dixo, está "nas mans do Goberno central".

"Os principios son claros, tanto o PP como a Xunta queren que isto pase a titularidade pública e que Galicia non teña que comprar por segunda vez este pazo", reivindicou.

REMODELACIÓN DO GOBERNO AUTONÓMICO

A entrevista tamén tratou sobre a incipiente remodelación do Goberno da Xunta que efectuará o presidente autonómico, Alberto Núñez Feijóo, tras a previsible saída do conselleiro de Política Social, José Manuel Rey Varela, e da titular de Medio Ambiente e Ordenación do Territorio, Beatriz Mato, para concorrer ás eleccións municipais polo PP en Ferrol e A Coruña, respectivamente.

En relación con iso, Román Rodríguez, lembrou que é unha decisión que corresponde a Feijóo, quen, ao seu modo de ver, demostrou, "en moitas ocasións, que toma unhas magníficas decisións que son positivas para o Goberno, primeiro, pero sobre todo que son positivas para Galicia".

Así mesmo, o conselleiro de Cultura, Educación e Ordenación Universitaria negou que nin Rey Varela nin Mato xa se despediron do Goberno autonómico no último Consello da Xunta. "Iso si que o podo dicir con total confianza", aclarou. En todo caso, Rodríguez expresou que unha remodelación do Executivo autonómico "sempre é un momento de recoller novas ilusións"