Por Europa Press / Redacción | SANTIAGO DE COMPOSTELA | 22/02/2021 | Actualizada ás 17:58
Un grupo de pais do colexio concertado La Salle, en Santiago de Compostela, presentarán unha queixa ante os servizos de inspección educativa e do Sergas para trasladar a súa preocupación pola actitude dunha docente que imparte aulas neste centro e o seu apoio ás teses negacionistas da covid-19.
A polémica orixinouse este fin de semana por mor da protesta contra da reforma da lei galega de saúde, na que participaron centenares de persoas de distintas partes do territorio. A marcha estivo organizada por colectivos como 'Policías pola Liberdade' e secundada por outros similares --Médicos pola Verdade, Nais pola Verdade e Docentes pola Verdade, entre eles--.
Varios pais e docentes do centro trasladaron ao equipo directivo que unha das persoas que encabezaba a marcha, ou que polo menos saía nas fotos difundidas da manifestación, tratábase dunha das profesoras do colexio e que xa fora amoestada nunha ocasión previa por incumprir o protocolo contra a covid e ir sen máscara.
Montse Trillo, presidenta da ANPA, explicou en declaracións a Europa Press que a asociación xa recibiu entre "25 e 30" correos electrónicos de pais con fillos escolarizados no colexio "preocupados por este comportamento". Deste xeito e "en nome dos pais", a ANPA enviará un escrito á inspección educativa e á de sanidade para informar do ocorrido e da preocupación trasladada polas familias pola actitude da profesora, un comportamento polo que "xa foi sancionada anteriormente".
PROBA PCR
A dirección do La Salle informou á profesora afectada das queixas dos pais e decidiu que non volvería impartir aulas ata que presentase unha PCR con resultado negativo. Desde a ANPA sinalan que o centro transmite que "está atado de pés e mans" e que fan "o que legalmente poden", pero tampouco pedirán nin o cesamento da profesora, senón que se limitarán a ser transmisores da preocupación das familias.
"GARANTIR A SEGURIDADE"
Jesús Martín, director do centro, enmarcou as posicións da profesora "dentro da liberdade de opinión", pero a condición de que as manteña fora do espazo educativo. En todo caso, defendeu que a súa "responsabilidade" é "garantir a seguridade" nas instalacións do centro e solicitou este luns á profesora que se someta a un test "para garantir que non hai ningún tipo de contaxio".
Á espera do resultado, a docente "non vai dar clase", matizou, para lembrar que os problemas con ela por incumprimento do protocolo da covid, polos que xa foi sancionada no seu momento, "non se volveron a repetir".
En todo caso, o director do centro asegurou que entende "o nerviosismo" e a "preocupación" dos pais tras ver a súa foto nos medios de comunicación, pero de momento rexeitou adoptar outro tipo de accións e reiterou que a afectada "tamén ten os seus dereitos".
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.