O Goberno galego terá que presentar antes de final de ano un cronograma sobre as axudas ao marisqueo no Parlamento

O Parlamento galego demandou á Xunta que remita á cámara antes de que finalice o ano un cronograma e as partidas orzamentarias para levar a cabo un plan de axudas ao marisqueo que, ademais de apoiar aos traballadores que dependen do sector, inclúa medidas para recuperar os bancos e mitigar os efectos do cambio climático nas rías.

A moción foi aprobada sen votos en contra (o deputado de Democracia Ourensana, Armando Ojea, optou pola abstención) durante o pleno que este martes arrincou na Cámara galega, onde o BNG defendeu a necesidade de adoptar axudas de maneira "urxente" ante o problema de produción que padecen os bancos marisqueiros galegos.

Así o defendeu a deputada frontista Rosana Pérez, quen alcanzou un acordo co PP para modificar o texto orixinal da iniciativa para solicitar o apoio do grupo maioritario ao cambiar o horizonte temporal da demanda ao Goberno galego, ao que inicialmente se pedía que presentase o cronograma nun prazo dun mes.

Finalmente, a Cámara reclama ao departamento autonómico que antes de que conclúa o ano 2024 leve ao Pazo do Hórreo un calendario dotado con respaldo económico que inclúa axudas directas ata a recuperación da normalidade nas rías que atravesan unha caída da produción polas intensas choivas do pasado outono.

Ademais, tamén reclama á Xunta a creación dun seguro público que asegure unha produción e uns ingresos mínimos en caso de inactividade, á vez que se lle insta a defender ante o Estado a exención das cotas da Seguridade Social mentres persista o problema de produción nas rías.

Unha rede de peixe na enseada de San Simón, Rías Baixas, a 17 de novembro de 2023, Pontevedra | Fonte: Adrián Irago - Arquivo

Durante a defensa da iniciativa, a deputada Rosana Pérez acusou o Goberno galego de dilatar a posta en marcha destas medidas "anunciadas", algunhas delas, con "electoralismo" ás portas das autonómicas do mes de febreiro pero que, tres meses despois, seguen sen materializarse.

Na súa quenda, o parlamentario popular Miguel Hidalgo defendeu a xestión da Consellería do Mar da crise produtiva nas rías e afeou que o BNG concorra ás europeas "por moito que o queira ocultar" cos "inimigos de España", en alusión á súa coalición con EH Bildu e ERC, e cos "inimigos da pesca", en referencia á pertenza ao eurogrupo da Alianza Libre Europea-Os Verdes.

En contraposición, Hidalgo xogou coas siglas da súa formación para defender que son o "PP, o partido da pesca"; o que levou a responder a Rosana Pérez na súa quenda de peche que esquecera de incluír "unha pe máis". "Son vostedes o partido da pesca profunda, tan profunda que en 15 anos non conseguiron que sala á boia", espetou a portavoz de Pesca dos nacionalistas.

Pola súa banda, o deputado do PSdeG Xullo Abalde afeou aos populares que insistan nas súas críticas ao Goberno pola non declaración de zona catastrófica das rías galegas polas precipitacións do outono e convidounos a entender que "non" se trata dun "problema" puntual senón que responde a un "cambio de condicións" asociado ao quecemento global que debe ser analizado, porque aos períodos de fortes choivas seguiranos secas e outros episodios extremos.

MOCIÓNS DE VIVENDA

Durante a mañá deste martes tamén foron debatidas outras dúas mocións da oposición sobre vivenda, nas que, por unha banda o BNG e, por outro, o PSdeG, solicitaban á Xunta medidas para paliar os problemas de acceso ao aluguer e a compra polas características do mercado.

No debate destes textos, rexeitados ambos co voto do grupo maioritario, Alexandra Fernández (BNG) lamentou que para a Xunta "non exista" un problema cos prezos do aluguer, algo que, ao seu xuízo, imposibilita que poida darse un "gran pacto" entre as forzas políticas galegas sobre a vivenda.

Pola súa banda, Carlos López Font (PSdeG) manifestou que o feito de que o presidente galego, Alfonso Rueda, apelase no seu discurso de investidura a alcanzar un pacto de vivenda evidencia o "fracaso" das políticas do PP en Galicia nos últimos anos, á vez que cualificou de "utópicas" algunhas das propostas do BNG para atallar a problemática vinculada ao mercado inmobiliario.

En nome do PP tomou a palabra a deputada María Deza, quen remarcou que a Xunta descarta declarar zonas tensionadas porque "non solucionaría" o problema e que a súa aposta pasa por "incentivar" o mercado con medidas de apoio á construción de nova vivenda e ofrecendo "garantías" e "seguridade xurídica" aos propietarios para que poñan no mercado a vivenda baleiras.