Os xulgados tramitan un 31,7% máis de asuntos no primeiro trimestre do ano
Este aumento ten que ver con trámites atrasados tras a folga de letrados do pasado ano.
Por E.P. | A Coruña | 12/06/2024 | Actualizada ás 11:50
Os órganos xudiciais galegos recibiron e resolveron máis procedementos no primeiro trimestre deste ano que nas mesmas datas de 2023, segundo informa o Tribunal Superior de Xustiza de Galicia (TSXG) en base a datos do Consello Xeral do Poder Xudicial (CGPJ).
En concreto, entre xaneiro e marzo os xuíces e xuízas de Galicia ingresaron 97.328 asuntos, un 31,7 por cento máis, e finalizaron 91.213, un 34,8 por cento máis. A taxa de litixiosidade, é dicir, o número de casos por cada mil habitantes, situouse en Galicia en 35,97, fronte aos 40,67 de media estatal.
"Este importante incremento, tanto no ingreso como na resolución de asuntos, garda relación coa folga que os letrados da Administración de Xustiza mantiveron desde o 23 de xaneiro ata o 28 de marzo de 2023, o cal levou un significativo descenso da actividade dos órganos xudiciais durante ese período do ano pasado", explica o alto tribunal galego.
Todas as xurisdicións experimentaron un incremento interanual na entrada de procedementos, pero os aumentos máis significativos rexistráronse na civil, un 53 %, e na social, un 34,4 por cento. O crecemento na resolución de asuntos tamén se produciu en todas as xurisdicións, destacando, tamén, a civil, pois finalizou un 49% máis, e a contencioso-administrativa, cuxo aumento foi do 34 por cento.
A 31 de marzo, os xulgados e tribunais de Galicia tiñan 201.776 asuntos en trámite, un 17 por cento máis que na mesma data do ano anterior, segundo o informe feito público hoxe pola Sección de Estatística do Consello Xeral do Poder Xudicial (CGPJ).
DATOS POR PROVINCIAS
Entre os pasados 1 de xaneiro e 31 de marzo na provincia da Coruña resolvéronse 34.534 asuntos e ingresáronse 35.310, un 51,8 % máis que no mesmo trimestre de 2023. Pontevedra recibiu 35.095 casos e finalizou 32.311 (27,5% máis). Na provincia de Lugo entraron 11.918 novos procedementos e, na de Ourense, 9.472, e resolvéronse 9.072 (un 2,4% máis) e 9.198 (64,2% máis), respectivamente.
