Probas Celga en Madrid en 2025 para a obtención do certificado de galego

O secretario xeral da Lingua, Valentín García, anunciou este mércores na súa visita á Casa de Galicia en Madrid, que o próximo 2025 a capital española acollerá as probas para a obtención dos certificados oficiais de lingua galega, unha iniciativa "para continuar promocionando a lingua e a cultura galegas dentro e fóra da Comunidade".

Deste xeito, o representante da Consellería de Cultura puxo en valor "o compromiso do Goberno galego co achegamento do idioma a persoas doutros territorios a través da convocatoria destas probas Celga noutros centros fóra de Galicia". Así, "búscase dar a oportunidade a cada vez máis persoas de obter esta certificación", destacou Valentín García.

No marco desta visita, o secretario xeral da Lingua tamén presentou os cursos de lingua e cultura galegas que se seguirán impartindo nesta institución e fixo entrega de diplomas aos participantes da pasada edición. Neste sentido, destacou a colaboración entre o Goberno Autonómico e a Casa de Galicia en Madrid, "por manter o traballo conxunto na realización desta actividade de formación e promoción do idioma fóra da comunidade galega".

Ademais deste acto, o representante da Xunta tamén tomou parte na presentación do libro 'Eduardo Pondal, Poemas', traducido por Julia Ures e presentado por Miguel Losada, onde destacou a figura do poeta como "unha das voces máis destacadas da Galicia do século XX, xunto con Rosalía de Castro ou Manuel Curros Enríquez".

Exames Celga | Fonte: XUNTA - Arquivo