Un incendio nunha vivenda afecta a unha casa lindeira en Agolada

Un incendio iniciado nunha vivenda da parroquia de Val de Sangorza, no municipio pontevedrés de Agolada, afectou tamén a unha vivenda lindeira, aínda que non se rexistraron danos persoais.

Sobre as 20,30 horas deste sábado, o 112 Galicia recibía o aviso deste lume a través dunha persoa particular, que alertaba dunha casa de dúas plantas ardendo. No seu relato tamén indicaba que había outras casas pegadas á vivenda afectada polas chamas. Con esta información, os xestores do 112 deron aviso aos servizos sanitarios, aos Bombeiros do Deza, aos membros do GES de Lalín, á Garda Civil e aos efectivos de Protección Civil da localidade.

Unha vez extinguido o lume, os servizos de emerxencias desprazados ata o punto confirmaron que ningunha persoa se viu afectada, pero as chamas danaron parcialmente dúas vivendas lindeiras. Así mesmo, os bombeiros comunicaron que un enchufe podería ser a causa do lume, que se propagou polas cortinas dunha das estancias dunha das vivendas afectadas.

Camión de bombeiros | Fonte: Consorcio Provincial de Bombeiros de Ourense.