Rueda di que un "comité técnico" propuxo non suspender as clases pola borrasca Herminia

O presidente da Xunta, Alfonso Ruedafixo un chamamento este luns a "seguir a recomendación das autoridades" de emerxencias ante a situación meteorolóxica adversa que aínda mantén alertas activas este luns en Galicia. Preguntado polos motivos polos que non se decretou a suspensión das clases, o presidente da Xunta, Alfonso Rueda, asegurou que é un comité de alertas o que toma esta decisión.

"Non a tomou e, por tanto había clases", sostivo nunha intervención na que tamén destacou a coordinación dos técnicos da Aemet e de Meteogalicia neste asunto. "A previsión é que hoxe --luns-- vaia mellorando as previsións meteorolóxicas en terra, pero no interior de Pontevedra, no noroeste da Coruña e na Mariña seguen en alerta amarela por fortes ventos", advertiu o mandatario galego.

Ao concluír a reunión semanal do Goberno autonómico, Rueda compareceu e ofreceu un balance das incidencias que deixou o temporal ata as 11.00 horas deste luns. En total, ao longo do fin de semana, o 112 rexistrou case 1.400 incidencias

Alfonso Rueda sinalou que "na maioría de casos só houbo danos materiais", aínda que tamén lamentou a morte dun condutor por unha saída de vía en Amoeiro; dous veciños de Lalín trasladados polo derrubamento dun tellado, aínda que "xa están dados de alta"; e un garda civil ferido por unha árbore na AP-9 en Vilaboa, que "permanece estable dentro da gravidade".

DIEGO CALVO: PREVISIÓN E PRECAUCIÓN

Na mesma liña pronunciouse tamén este luns o conselleiro de Presidencia, Diego Calvo, quen, en declaracións aos medios nun acto, incidiu na importancia da previsión e da precaución para que as consecuencias dos temporais teñan o menor impacto posible. Calvo fixo un balance das incidencias rexistradas e insistiu na importancia de que a cidadanía actúe con "precaución" desprazándose, por exemplo, só nas ocasións que "sexan imprescindibles".