"Scandia non pode tomar o pelo a sindicatos, á Xunta e ao pobo galego"
Os traballadores da conserveira Thenaisie irán á folga tres días á semana a partir de setembro.
Por Europa Press / Redacción | SANTIAGO DE COMPOSTELA | 22/08/2020 | Actualizada ás 21:47
Os traballadores da conserveira Thenaisie Provote, que entrou en concurso de acredores o pasado mes de maio pola súa situación de insolvencia, irán a unha folga convocada durante tres días á semana a partir de setembro co obxectivo de reclamar unha solución para os 125 empregos das dúas plantas do Grove --fábrica de produción-- e Mos --loxística--.
Segundo informa a Europa Press a sindicalista da CIG Rosa Abuín, este sábado os traballadores aprobaron por "unanimidade" en asemblea un calendario de mobilizacións que inclúen esta folga despois de que a dona, o grupo romanés Scandia Food, presentase un plan "inviable" para os próximos cinco anos, que foi rexeitado pola Xunta.
Abuín lamenta que están "peor que ao principio", pero "sen a oferta de Alfonso Caneiro", o armador galego que mostrou o seu interese por facerse con Thenaisie pero retirouse ante a falta de avances.
Por iso, os traballadores reclaman unha reunión a próxima semana coa Xunta na que tamén participen Scandia, os avogados de Garrigues que representan á compañía e os administradores concursais co fin de abordar o futuro da compañía.
Así, avisa de que Scandia "non pode burlarse, nin tomar o pelo a sindicatos nin á Xunta nin ao pobo galego", xa que "alguén terá que obrigarlle a vender se non quere seguir cun plan de negocio viable".
