Evacuado en helicóptero un operario tras sufrir un grave corte nunha canteira na Estrada
A ferida afecta ao brazo e, segundo informacións do 112, podería carrexar a perda da extremidade.
Por E.P. | SANTIAGO DE COMPOSTELA | 21/04/2022 | Actualizada ás 13:54
Un operario foi evacuado de maneira urxente en helicóptero este xoves tras sufrir un corte grave nun brazo con posible perda do membro nunha canteira do municipio pontevedrés da Estrada. Así o informaron o 112 Galicia e o 061, en relación ao accidente que se produciu mentres traballaba nunha canteira na parroquia de San Miguel de Castro, na Estrada.
Segundo a información facilitada ao 112 Galicia por varios particulares que contactaron coa central de emerxencias sobre as 10,15 horas, o home presentaba lesións importantes no brazo que podían supor a perda da extremidade. Por iso, os xestores do 112 comunicaron a situación a Urxencias Sanitarias de Galicia-061 que, tras máis ter constancia dos feitos, informou da mobilización do helicóptero medicalizado con base en Santiago para atender ao ferido.
Fontes sanitarias indicaron a Europa Press que, ademais do helicóptero, foron mobilizados unha ambulancia de soporte vital básico e un equipo sanitario de Atención Primaria da Estrada, aínda que finalmente a aeronave levou ao Hospital Clínico de Santiago ao ferido, A.P.G., de 35 anos.
Así mesmo, ao momento do accidente, concretamente no lugar de Prado, tamén se desprazaron axentes da Garda Civil co fin de coñecer as circunstancias nas que se produciu o suceso. Ademais, o 112 Galicia avisou tamén á Policía Local e Protección Civil da Estrada por se fose necesaria a súa colaboración.
