Director xeral de Turismo: "Agora mesmo non atopamos ningún grave problema de masificación"

O director xeral de Turismo, Xosé Manuel Merelles defendeu este xoves que o plan estratéxico autonómico 2024-2030 aposta pola sustentabilidade na actividade turística, tanto económica como social, como na contorna da natureza. No marco dunha presentación do Foro Económico de Galicia, subliñou, así mesmo, en que a dixitalización favorecerá que o turismo sexa "cada vez máis sustentable", e defendeu que é preciso que sexa respectuoso na convivencia cos veciños. "Creo que agora todas as institucións e asociacións de empresarios estamos no mesmo camiño", esgrimiu.

Ao tempo, aínda que asegurou que a pesar de que si existen "concentracións importantes en determinados puntos e en determinados momentos", en Galicia a xestión do turismo é "totalmente normal" neste momento.

En todo caso, sinalou que existen "uns graos de estacionalización moi importantes", pero avanzouse, por exemplo, na "diversificación" das rutas do Camiño de Santiago, o que "baixa a presión" na tradicionalmente máis transitada --o Camiño Francés--. "A verdade é que agora mesmo non atopamos ningún grave problema de masificación", resolveu.

TAXA TURÍSTICA

Por outra banda, afeou as formas do goberno de Santiago no que respecta ao deseño e remisión do informe da taxa turística que propón o equipo que dirixe Goretti Sanmartín. Así, atribuíu "deslealdade institucional" ao goberno local, e censurou que, á marxe das pernoctacións, na proposta non se aborden outras cuestións como o excursionismo.

Nun acto en Santiago, a preguntas dos medios, Merelles defendeu que a proposta debería abordarse no marco do Plan de Sustentabilidade Turística, do que participan tamén o goberno local e o Executivo estatal, ademais de defender que tería que existir "diálogo social e tamén cos empresarios turísticos".