25N.- Estas son as medidas dos principais partidos para loitar contra a violencia machista

O BNG presentou un paquete de 25 medidas para combater a violencia machista nun 25N que considera que non pode converterse nunha efeméride instalada na rutina e nos "discursos baleiros", sen que implique compromisos e unha acción política decidida na loita contra a violencia de xénero. Así o explicou a portavoz nacional, Ana Pontón, e a responsable de Acción Feminista e portavoz parlamentaria de Igualdade, Noa Presas, que, xunto a outras deputadas da formación na Cámara galega, presentaron un conxunto de medidas para loitar de forma transversal e en todos os ámbitos contra a violencia machista.

"Faltan medios, faltan recursos e falta acción política", denunciou Pontón, quen advertiu que "o terrorismo machista non se vai a solucionar nin con minutos de silencio, nin con lazos lila, nin desde políticas rutineras" e moito menos, "pactando, gobernando e mesmo asumindo unha parte do discurso negacionista da extrema dereita como está a facer no PP". Desde o convencemento de que o 25N ten que servir para a reflexión, a reivindicación e a concreción de propostas que permitan achegar solucións ao problema, as 25 medidas presentadas polo BNG están articuladas sobre cinco grandes liñas de actuación: incrementar os recursos económicos destinados a combater a violencia de xénero e os medios; aumentar as axudas directas ás vítimas; reforzar a rede pública de loita contra os machismos; e educar e formar en igualdade.

Entre as propostas, a formación nacionalista avoga en primeiro lugar por destinar o 1 % do orzamento da Xunta (130 millóns) á loita contra as violencias machistas, unha proposta que, segundo denuncian, foi vetada polo PP. "Esperamos que esta vez rectifiquen e acepten a emenda do BNG aos orzamentos de 2025", sostivo Pontón. Así mesmo, propón incrementar as axudas destinadas ás vítimas e actualizalas conforme ao IPC e pór en marcha unha nova axuda para que as mulleres que queiran saír da prostitución poidan facelo a través dun programa específico. No que respecta ao terceiro ámbito de actuación, o BNG aposta por reforzar a rede pública contra os machismos, dotando de atención psicolóxica integral a todos os centros de saúde de Atención Primaria, tal e como recolle a lei pero que segue sen cumprirse; ampliando todas as medidas de intervención en colaboración co Colexio de Psicoloxía de Galiza; e revertendo a decisión do Goberno de "privatizar" a xestión dos centros de crises 24 horas.

Unha decisión que, conforme advertiu Pontón, permite "facer negocio coa loita contra a violencia machista" ao deixar estes centros en mans de dúas multinacionais, OHL e Eulen, ás que "se lles vai a dar sete millóns de euros por un servizo que debe estar prestado desde o ámbito público". "É triste e unha indecencia que o PP pense que con todo se pode facer negocio, mesmo coa violencia contra as mulleres", profundou. Neste ámbito de actuación, a formación nacionalista tamén propón mellorar a rede de acollida, aumentando os CIM (Centros de Información á Muller), revisando o sistema VioGen, así como todos os dispositivos electrónicos de protección, ou dotando a todas as cidades galegas de xulgados específicos de violencia de xénero.

Finalmente, a proposta do BNG pon o foco na educación e a formación en igualdade, con medidas como a recuperación da materia optativa de igualdade, a elaboración coa comunidade educativa dun plan de educación afectivo-sexual que garanta unha educación integral en todos os ámbitos e en todas as etapas educativas, ou a posta en marcha de programas de formación para todos os profesionais que interveñen na cadea de resposta ás vítimas, desde o juríico, ao policial ou sanitario.

A portavoz nacional contrapuxo as alternativas do BNG a un PP que "nin sequera foi capaz de desenvolver plenamente a Lei galega contra a violencia machista, vixente desde hai 17 anos". "As administracións non se poden relaxar nin normalizar a existencia de violencia machista", advertiu, para reclamar "máis medios e máis recursos" para que o 25N non quede nun día, senón que os 365 días do ano sexan 25 de novembro. Na mesma liña pronunciouse a responsable de Acción Feminista do BNG, Noa Presas, quen advertiu que o que require a violencia machista para ser realmente combatida é que se poña toda a "intelixencia colectiva" e se concreten medidas para darlle resposta.

Presas advertiu que o 25N ten que ser unha data de loita, como o foi sempre para o feminismo, pero tamén unha data na que desde as institucións e as diferentes administracións párese a reflexionar e se trasladen "proposta concretas". "Esperamos que as medidas que presentamos hoxe sexan benvidas e que haxa compromisos por parte das institucións, pois nos preocupa a normalización que está a haber da violencia machista", dixo para finalizar facendo un chamamento a toda a sociedade galega a sumarse ás mobilizacións que vai levar a cabo o feminismo este luns. "Desde o BNG estaremos co feminismo galego de base e reivindicamos tamén que as administracións teñan ambición política para facer da violencia machista e da súa erradicación o centro da axenda política", concluíu Presas.

Pola súa banda, preguntada pola división das concentracións convocadas este luns, Pontón sostivo que todas as feministas teñen "un horizonte claro e común", como é "loitar contra a violencia machista", un dos "grandes problemas da sociedade". "Non me preocupa tanto que a extrema dereita, na que se apoia o PP, queira utilizar eses debates en contra do feminismo, o que me preocupa é que se cuestione a existencia da violencia machista como fai esa extremadereita coa que pacta o PP", dixo.

O PSDEG APOSTA POLA EDUCACIÓN, FORMACIÓN E COORDINACIÓN INSTITUCIONAL

Pola súa banda, a portavoz de Igualdade do Grupo Socialista, Paloma Castro, reclamou este luns á Xunta que atenda a reivindicación social e "pase do papel á acción" contra a violencia de xénero e apoie a loita de toda a sociedade contra o terrorismo machista. A responsable socialista ofreceu unha rolda de prensa con motivo da celebración do Día Internacional da Eliminación da Violencia contra a Muller para pedir ao Goberno galego que exerza a cobertura legal da que dispón e empezo por cumprir os plans executivos que "non están a cumprir".

A responsable socialista apuntou que "non chega" con celebrar actos na rúa e que é necesario tomar "medidas reais" para frear os asasinatos machistas e preservar a integridade das mulleres, especialmente despois dunha "fin de semana negra". Así, aludiu ás mulleres asasinadas esta fin de semana e ás dúas vítimas de agresións machistas rexistradas o domingo en Galicia. A parlamentaria advertiu que o que non axuda é a "irresponsabilidade absoluta" mostrada pola conselleira de Igualdade, Fabiola García, que segundo indicou secunda o presidente da Xunta, Alfonso Rueda, de cuestionar o sistema VioGen, coa que "están a pór en risco a seguridade das vítimas".

Advertiu, ademais, do "contrasenso" que supón empezar dicindo que as vítimas teñen que denunciar para, acto seguido, dicir que o sistema que as protexe "non é efectivo", como, segundo sinalou, fai a conselleira. Así, criticou o "intolerable cuestionamento dun sistema que salva vidas e que está en continua revisión e mellora" porque "funciona e protexe" por un amplo equipo que traballa de forma "permanente e continua" para que as mulleres estean protexidas. Paloma Castro apelou ao traballo "incansable" das forzas e corpos de seguridade encargadas de facer o seguimento 24 horas ao día 365 días ao ano, e medidas como o sistema Cometa, que vén de renovar as pulseiras de seguimento.

Reiterou que "o sistema funciona" e incidiu en mandar unha mensaxe ás mulleres vítimas e a todas as testemuñas de casos de violencia de que "dean o paso de denunciar, porque é a chave que abre a porta da súa liberdade". Ademais, advertiu que a maior parte das mulleres asasinadas non denunciara e que o sistema non fallou en ningún dos catro casos tráxicos de asasinatos machistas rexistrados en Galicia no que vai de ano, tal e como sabe a Xunta. Paloma Castro reclamou a implicación de toda a sociedade para illar aos agresores ata erradicar o que cualificou de "terrorismo machista, que pon en risco a liberdade, a igualdade e a democracia", nunha "sorte de fascismo misóxino" que supón o "exercicio do poder extremo dun ser humano sobre outro ata a súa morte".

Así, chamou ao compromiso da sociedade para impedir que calen as mensaxes negacionistas que provocan que o 23 % dos mozos e o 13 % das mozas pensen que o machismo é un invento ideolóxico. Tamén advertiu que a pesar de todos os avances lexislativos e sociais os índices de violencia machista "seguen sendo escandalosamente altos e absolutamente inaceptables", e levan a pensar na persistencia dun tipo estrutural de violencia machista. Castro emprazou a traballar en tres eixos, como son a educación, a formación en igualdade dos profesionais que traballan en primeira liña coas mulleres vítimas e na coordinación interinstitucional que asegure unha asistencia adecuada ás vítimas que decidan denunciar, coordinando o ámbito xudicial, psicolóxico, laboral, económico, habitacional e de protección.

A responsable socialista lamentou que o Goberno galego "non estea a tomar en serio o papel fundamental dunha educación en igualdade para crear unha sociedade de futuro que sexa igualitaria" e lamentou que a conselleira non asumise que no pleno do Parlamento foi aprobada unha proposta socialista para incorporar a educación afectivo-sexual nas escolas a partir do próximo curso. A parlamentaria socialista sostivo que non chega con manter charlas nos institutos, senón que debe formar parte do currículo educativo. "Só así será posible que os nenos e nenas crezan tendo claros os conceptos da igualdade, o respecto mutuo, a solución non violencia de conflitos nas relacións, o rexeitamento da violencia contra as mulleres, ou o que é a violencia sexual, a pornografía e a prostitución", dixo.

Por último, criticou que o Goberno galego non puxese en marcha unha soa das medidas do I Plan contra a Trata 2022-24 e reduza en 300.000 euros a partida orzamentaria mentres a conselleira "sitúa o foco" no impulso da Lei estatal de trata. Esta norma, conforme apuntou, incorpora unha modificación do Código Penal para camiñar cara á abolición da prostitución e reclamou a PP e BNG que "rectifiquen" e apoien esta medida. "É imposible considerarse feminista e estar a favor da mercantilización do corpo das mulleres", indicou.

PEDRO BLANCO INCIDE NA NECESIDADE DE LOITAR "TODOS OS DÍAS"

O delegado do Goberno en Galicia, Pedro Blanco, incidiu na necesidade de loitar o conxunto da sociedade "todos os días" contra o "terrorismo machista" no acto conmemorativo do 25N, Día Internacional da Eliminación da Violencia contra a Muller. Foi tras a lectura do manifesto aprobado en Consello de Ministros a cargo, entre outras persoas, da alcaldesa da Coruña, Inés Rey, e da subdelegada do Goberno na provincia, María Rivas.

O acto comezou cunha acción reivindicativa na que se empregaron os panos bordados con lemas contra o machismo e con nomes de vítimas da violencia de xénero, que se teceron no taller 'Bordados contra a Violencia', dirixido pola ilustradora Bea Lema. Esta acción emulou a que realizan colectivos feministas noutros puntos do mundo, como México, para denunciar os feminicidios nos seus países. Posteriormente, tivo lugar a lectura da declaración institucional, ao que seguiu un minuto de silencio en memoria das vítimas da violencia.

Na declaración, incidiuse nas medidas aprobadas polo Goberno e o traballo que se desenvolve en colaboración con comunidades autónomas para incentivar as actuacións de prevención ou o reforzo ás vítimas no exterior. Isto con recordo aos menores asasinados este ano nunha lectura na que se insistiu tamén na importancia dunha "loita global" e en abordar "cambios profundos" para evitar reforzar "roles patriarcais".

Todo iso, apostilouse, a través dunha educación "integral". Xa en declaracións aos medios de comunicación, o delegado do Goberno remarcou que debe seguirse "reivindicando a erradicación" deste tipo de violencia. "Concienciar e loitar", resumiu Blanco para quen debe ser "todos os días" para chegar a un 25N no que "non exista discriminación nin violencia contra a muller".