A orde de axudas a cargo ao 0,7 % do IRPF para programas con fins sociais increméntase ata os 33 millóns de euros

A Xunta incrementa en 5,2 millóns de euros a orde de axudas con cargo ao 0,7 % do IRPF destinada a financiar programas de carácter social, ata alcanzar os 33 millóns de euros, un 20 % máis que a anterior convocatoria. O Diario Oficial de Galicia (DOG) publica este luns este aumento de crédito, que ten por obxecto atender todas as solicitudes que cumpran cos criterios establecidos.

Poderanse beneficiar destas achegas as entidades que traballen no ámbito da Consellería de Política Social e Igualdade, é dicir, que desenvolvan accións destinadas á protección da infancia, a atención das persoas maiores e con discapacidade, a inclusión social, a promoción da igualdade entre homes e mulleres, ou a prevención da violencia de xénero e o apoio ás vítimas e aos seus fillos.

Estas axudas permiten, ademais, financiar obras ou comprar vehículos e outro tipo de equipamento. Ata agora, só podían utilizar as achegas para estes conceptos as entidades do ámbito da atención ás persoas maiores e con discapacidade, pero, como novidade, agora tamén poderán facelo as que se dedican á infancia, a familia e a inclusión social.

En 2023, financiáronse grazas a estas axudas ao redor de 700 programas e accións de carácter social da man de case 150 entidades. Como na anterior convocatoria, o Goberno galego anticipará aos beneficiarios o 100 % da subvención cando lles sexa notificada a concesión, permitindo que a xustificación das achegas se realice posteriormente, unha vez completadas as actividades financiadas.

IRPF | Fonte: GESTHA - Arquivo