O presidente de Caype confía en que o sumario da Operación Zeta “se desinche como un souffle”

O presidente da Confederación Española de Autónomos e Profesionais de España (Caype), Eliseo Calviño, mostrouse confiado en que o sumario da 'Operación Zeta' -que investiga unha suposta fraude na obtención de subvencións públicas para cursos de formación- "se desinche como un souffle".

En declaracións aos xornalistas, antes de declarar ante a titular do Xulgado de Instrución número 6 da Coruña, o presidente de Caype sinalou que a súa intención é expoñer "as cousas que son a realidade", "non especulacions", dixo ao criticar o contido da investigación.

"A ver se dunha vez, se desincha o souffle que se creou de forma ficticia", insistiu o presidente de Caype, quen asegurou que non se sente identificado cos presuntos delitos cos que se lle vincula e cunha investigación que se iniciou a finais de 2011 a partir da denuncia de dúas ex-empregadas súas sobre supostas irregularidades na súa xestión.

PREMISAS "FALSAS"

Pola súa banda, o seu letrado Xosé Antón Pérez-Lema afirmou que ofrecerán unha "versión coherente" fronte a un sumario "inflado" e con "especulacións da Unidade de Delitos Fiscais da Policía e da Axencia Tributaria", engadiu.

"Empézase a desinchar un sumario caótico cunhas conclusións que derivan de premisas falsas", engadiu en liña coas manifestacións do seu cliente. Con todo, sinalou que os autores dos informes xurdidos da investigación están feitos por "funcionarios públicos honrados, pero que non saben nada de formación".

En alusión ao informe pericial que o avogado do empresario Gerardo Crespo, presunto líder da trama, avanzou que presentarán explicando como se desenvolvían os cursos, dixo que "parece que o destinatario da formación, das axudas públicas, son os usuarios".

"Non hai ningún delito de estafa, non hai dano patrimonial, é unha contratación pública e non un expediente de subvencións", argumentou.

INVESTIGADOS

Inicialmente, nesta causa, foron citados en condición de investigados un total de 30 persoas, entre eles as dúas persoas citadas a declarar en decembro. Nun posterior auto da xuíza, figuraron 25 novos investigados e outras 23 testemuñas.

Nela, investígase unha posible fraude no cobramento de subvencións tras recibir un atestado do Grupo de Delincuencia Financeira e Fiscal da Brigada Provincial da Policía Xudicial na Coruña.

En concreto, é polos delitos de fraude de subvencións ou estafa e malversación de caudais públicos, ademais doutros delitos conexos como falsidade documental, suborno e branqueo de capitais.