Galicia está entre as comunidades que máis fondos estatais reciben para servizos sociais
O Goberno destinou 7'9 millóns á comunidade galega, a quinta con maior dotación.
Por E.P. | SANTIAGO DE COMPOSTELA | 13/08/2020 | Actualizada ás 12:50
A Delegación do Goberno informou da concesión por parte do Executivo estatal dun total de 7,9 millóns de euros para servizos sociais, segundo os criterios de repartición acordados polo Consello Territorial e do Sistema para a Autonomía e Atención á Dependencia. O departamento que dirixe Javier Losada sinalou que a orde do Ministerio de Dereitos Sociais e Axenda 2030 que publica o Boletín Oficial do Estado inclúe 45 millóns de euros do Programa de protección á familia e atención á pobreza infantil, no que a Xunta recibe 3,41 millóns, un 7,58% do total.
Dentro desta liña, segundo apunta, hai un programa específico para garantir o dereito básico á alimentación, lecer e cultura dotado con 15 millóns, dos que ao Goberno galego lle corresponden 1,14 millóns, tamén un 7,58%. A repartición inclúe prestacións básicas de servizos sociais, por 40 millóns de euros para aspectos como información e orientación, axuda a domicilio e apoio á unidade de convivencia, aloxamento alternativo e prevención e inserción social. Neste caso, a Administración galega recibe 3,31 millóns, un 8,37% do total.
Os proxectos de intervención social integral para a atención, prevención da marxinación e inserción do pobo xitano están dotados con 412.500 euros, dos que o Executivo autonómico recibe 28.411,72 euros, un 6,89%.
QUINTA COMUNIDADE QUE MÁIS FONDOS RECIBE
A Delegación do Goberno sinalou que, con estes 7,9 millóns, a Xunta é a quinta administración autonómica que máis recibe do conxunto do Estado segundo os criterios establecidos no Consello Territorial de Servizos Sociales. O Ministerio de Servizos Sociais, en mans de Pablo Iglesias, xa destinara 18,9 millóns a Galicia durante os meses de máis impacto da pandemia da COVID-19.
