O comité de Navantia tapona a entrada ao estaleiro para protestar contra a "cacicada" da dirección
Sindicatos acusan á dirección de vulnerar as bases de convocatoria para a cobertura de prazas
Por E.P. | SANTIAGO DE COMPOSTELA | 02/12/2020 | Actualizada ás 12:28
Delegados do comité de empresa de Navantia Ferrol impediron á primeira hora da mañá deste mércores --de 5,30 a 7,00 horas--, o acceso dos traballadores ao estaleiro, unha medida de protesta que se desenvolveu para denunciar "a sabotaxe" por parte da dirección ás "relacións laborais".
A parte social acusa á dirección da ría de Ferrol do "incumprimento do convenio colectivo en diversos conceptos", ademais de "non implementar o plan industrial co que se establecía a transformación dixital do estaleiro de Ferrol, coa construción dun dique cuberto e plans industriais para o estaleiro de Fene (A Coruña) e para a fábrica de Turbinas". Ademais, tamén carga contra a dirección por "non dotar de contido á Comisión central de produtividade" e pola súa negativa a "abrir a comisión da industria auxiliar".
NOVOS ACCESOS
O presidente do comité de empresa, Emilio García Juanatey (CCOO), tamén criticou a actitude da dirección da empresa no proceso de novas incorporacións, ao estimar que se está "dificultando que as prazas de acceso sexan obxectivas e transparentes". Deste xeito, incidiu en que "o último detonante" foi que "catro aspirantes que xa superaran todas as probas que recollían as bases" fosen rexeitados "tras un test dun psicólogo", unha medida que, segundo apunta Juanatey, "non aparece recollida na convocatoria". Así as cousas, reclamou que o criterio da Comisión de emprego se asente en permitir a entrada das mellores puntuacións durante a terceira proba.
PARA A CXT, "UNHA AUTÉNTICA CACICADA"
Por outra banda, a Sección sindical da CXT no estaleiro ferrolán acusou á dirección local de practicar "unha auténtica cacicada" coas probas de novos accesos, á que acusa de "violar as bases" que elaboraron. A través dun comunicado, aseguran que Navantia excluíu a catro persoas que sacaron a nota suficiente para obter praza, tal e como recollen as bases, pero que "non obtiveron o visto e prace dun psicólogo contratado por Navantia para facer algunhas entrevistas persoais telemáticas, entrevista que non aparecen nas bases, e que tampouco se lle fixo a todos os candidatos".
O sindicato considera que esta situación evidencia un exemplo de "nepotismo", e que o darse nunha empresa pública "é gravísimo". Así as cousas, a CXT subliña que Navantia é unha empresa pública e, por tanto, "debe de seguir os procedementos transparentes e obxectivos propios da Administración pública". "Exclúe a xente por motivos escuros que oculta tras a escusa do segredo clínico dun psicólogo, ou por exceso de coñecemento, como xa pasou nas prazas de universitarios júnior".
