Asime calcula en 1.500 os empregos que se perderán no sector do metal en Ferrolterra ata 2023
"Neste momento é necesario apostar polas zonas máis deprimidas no ámbito económico e industrial, como sabemos que é Ferrol" din desde ASIME.
Por E.P. | SANTIAGO DE COMPOSTELA | 29/01/2021 | Actualizada ás 18:44
O secretario xeral da Asociación de industrias do metal e tecnoloxías asociadas de Galicia (Asime), Enrique Mallón, prevé que, "entre abril deste ano e xaneiro de 2023, perderanse ata 1.500 postos de traballo na comarca de Ferrolterra".
Avisa que é "un dos peores panoramas desta zona nas últimas décadas" se non hai "noticias de relevancia" que cambien a situación. Estas manifestacións realizounas o representante da patronal nunha comparecencia ante os medios de comunicación este venres, 29 de xaneiro, na sede desta asociación en Narón.
Mallón destacou que na actualidade hai no sector do metal nesta comarca uns 3.800 traballadores, dos que "un 72% están vinculados ao sector naval e eólica mariña, e dos que un 90% perderían o seu emprego se non se producen cambios". Ante este panorama, Asime demanda ao Goberno central "impulsar os investimentos do Estaleiro 4.0 e un esforzo para construír ese dique que tanto se demanda para Navantia".
"Neste momento é necesario apostar polas zonas máis deprimidas no ámbito económico e industrial, como sabemos que é Ferrol; e sabemos que ten que ser unha aposta a medio e longo prazo, ademais de buscar a chegada de empresas á zona, para dar confianza, algo determinante no ámbito empresarial", opina.
EÓLICA MARIÑA, ENDESA E SIEMENS
En canto á eólica mariña, Mallón destacou a aposta realizada por Navantia e Windar no ámbito da construción de soportes para os aeroxeradores mariños. Aquí, "a pandemia tamén está a dificultar algúns proxectos".
Considera que "hai que dar unha aposta definitiva por crear un 'hub' de eólica mariña desde Ferrol". "Este liderado tamén se podería traducir na instalación de parques eólicos mariños preto das costas galegas e nas próximas semanas e meses todos poderémonos convencer diso", razoa.
Ademais, Asime reclama que "non se debe de permitir o peche da central térmica de Endesa". "Aliñámonos co posicionamento da Xunta nesta demanda, e que o Goberno central non autorice o seu peche mentres non teñamos un plan sustitutivo para a actividade", explica. "Temos que esixir que non se pode pechar esta central se non hai un proxecto alternativo e efectivo", aspotilla Mallón.
No caso da planta de Siemens Gamesa nas Somozas, Mallón mostrouse "optimista" con este centro produtivo, "porque quizais poida haber algún proxecto de investimento". "Estaremos atentos, pero se se executa finalmente este peche, sen outra alternativa, isto motivaría outra perda importante de empregos", deixa claro.
Por último, desde esta asociación patronal subliñou que "Ferrol ten que ser unha das áreas prioritarias non só de Galicia, senón de todo o territorio nacional". Resalta que "hai moito coñecemento industrial". Por iso, "é fundamental que cheguen aquí fondos de reestruturación".
