Alsa reduce as súas conexións nun 50% nas áreas de Ferrol e A Coruña nas fins de semana e festivos
Di que nestes períodos hai unha maior caída de viaxeiros, próxima ao 80% respecto dos días laborables.
Por Europa Press / Redacción | A CORUÑA | 12/02/2021 | Actualizada ás 10:59
O operador de mobilidade Alsa reducirá nun 50% os seus servizos de transporte durante os fins de semana e os días festivos nas áreas de Ferrol e A Coruña desde este sábado. Nun comunicado, Alsa detallou que esta medida afectará os servizos do contrato XG-642 Metropolitano de Ferrol e o contrato XG-881 Leste da Comarca da Coruña e que se aplicará en cumprimento á resolución da Dirección Xeral de Mobilidade da Xunta pola que se habilitan determinadas medidas en relación coa COVID-19 no transporte público regular interurbano de viaxeiros.
Deste xeito, suprimiranse o 50% das expedicións que operan sábados, domingos e festivos, aínda que se garantirá o mantemento de polo menos un servizo de ida e volta diario en cada liña. Precisamente, os fins de semana representan os períodos nos que se rexistra unha maior caída de viaxeiros, próxima ao 80% respecto dos días laborables.
En concreto, a redución de servizos aplicarase ás franxas horarias cun menor número de pasaxeiros por cada liña, mentres se manterán as de maior demanda, polo que afectará en maior medida ás conexións en horario de tarde.
Alsa informou destas modificacións aos municipios afectados e a través de cartelaría no interior dos vehículos e nas principais paradas. Ademais, os horarios poden consultarse nas súas páxinas web (www.alsaferrol.es e www.alsacalpita.es).
