O comité de Xeal esixe á Xunta que reclame á empresa un plan de viabilidade

O comité de Xeal esixiu á Xunta que reclame á empresa a posta en marcha dun plan de viabilidade "que garanta a continuidade industrial e o mantemento de todos os postos de traballo".

Así o traslada tras unha reunión con representantes autonómicos, "na que se constatou que o Goberno galego segue sen asumir as súas responsabilidades e sen querer exercer as súas competencias".

"Ante este deixamento, a representación do persoal instou, unha vez máis, á Xunta a que faga valer as cláusulas das concesións e obrigue a Xeal a pór en marcha un plan de viabilidade que garanta a continuidade industrial e o mantemento de todos os postos de traballo", engade.

"Desde a chegada do fondo TPG-IThaka, nunha operación fraudulenta que só persegue facerse co negocio da produción eléctrica, nin se executaron os investimentos comprometidos, nin se presentou un plan industrial que dea viabilidade á produción e permita a continuidade dos empregos", argumenta.