O Colexio de Podólogos de Galicia reclama a inclusión da Podoloxía na sanidade pública
O Colexio de Podólogos de Galicia solicitou unha reunión co conselleiro Julio García Comesaña para tratar esta cuestión "e outras de interese para a profesión e a cidadanía en xeral", explicou a entidade.
Por E.P. | SANTIAGO DE COMPOSTELA | 23/03/2021 | Actualizada ás 17:20
O Colexio de Podólogos de Galicia solicita á Xunta que apoie a incorporación da Podoloxía á sanidade pública tras a aprobación no Congreso dos Deputados o pasado mércores, 17 de marzo, dunha proposición non de lei neste sentido.
O presidente da entidade colexial galega, Juan Dios Tomé, espera que "o conselleiro de Sanidade presione con esta medida ao Ministerio de Sanidade e vote a favor cando chegue ao Consello Interterritorial de Saúde".
Ademais, o Colexio de Podólogos de Galicia solicitou unha reunión co conselleiro Julio García Comesaña para tratar esta cuestión "e outras de interese para a profesión e a cidadanía en xeral", explicou a entidade.
A Comisión de Sanidade do Congreso aprobou por unanimidade (36 votos a favor, cero abstencións e cero en contra) unha proposición non de lei presentada polo Grupo Plural para a inclusión da Podoloxía na carteira de servizos do Sistema Nacional de Saúde.
A proposición, lembra a entidade galega, aprobouse cunha emenda transaccional "para recoller as inquietudes do PP e PSOE de que dita inclusión se faga tras os informes do Ministerio de Sanidade e coa aprobación final no Consello Interterritorial de Saúde" no que están o Ministerio de Sanidade e as Consellerías de Saúde das Comunidades Autónomas.
A proposición inicial, presentada polo Grupo Plural en maio de 2020, pedía ao Congreso dos Deputados que instase o Goberno a "ampliar a carteira de servizos do Sistema Nacional de Saúde para incorporar os servizos podolóxicos, incluíndo especialmente e nun breve prazo, a podoloxía en Atención Primaria e especializada e o coidado do pé xeriátrico, do pé infantil e do pé diabético".
Como antecedente na Comunidade galega, xa en 2017 a xunta de goberno do Colexio de Podólogos de Galicia reuniuse cos diferentes grupos parlamentarios para exporlles as súas demandas profesionais.
Naquel momento, solicitouse a inclusión do podólogo na carteira básica de servizos do Sistema Nacional de Saúde e na carteira complementaria de Galicia, así como a incorporación da categoría profesional do podólogo como persoal estatutario do Sergas.
Finalmente, lembra a entidade colexial, "conseguiuse un primeiro e gran paso" xa que a Comisión 5ª de Sanidade aprobou o texto "O Parlamento de Galicia insta á Xunta de Galicia a demandar do Goberno de España que inclúa a Podoloxía na Carteira Básica do Sistema Nacional de Saúde, dotándoa dun financiamento xusto e necesario para a súa posta en marcha e desenvolvemento".
TRABALLO POR DIANTE
En todo caso, para a entidade colexial supón "un avance importante", pero "é só a continuación dun proceso que se iniciou co debate de proposicións similares á hoxe aprobada en varias cámaras autonómicas, nalgúns casos apoiadas tamén por unanimidade".
"Este paso que se deu no poder lexislativo terá un carácter executivo unha vez que o aprobe o Consello Interterritorial de Saúde e logo serán as comunidades autónomas as responsables da súa execución e de convocar as prazas que consideren necesarias no seu territorio", sinala.
De feito, algunhas comunidades, como Cantabria e Baleares, xa se adiantaron á inclusión da Podoloxía na carteira básica de servizos do Sistema Nacional de Saúde, e convocaran prazas de profesionais da Podoloxía, "que xa están a exercer", conclúe a entidade colexial.
