O comité clínico cre que "en dúas semanas" se eliminarán restricións e os límites ás reunións
Con todo, avisan que o virus "segue circulando" entre o non vacinados, polo que preocupan os "brotes escolares, sociais e os laborais", xa que son os menores de 50 anos os que aínda non están inmunizados.
Por Europa Press / Redacción | SANTIAGO DE COMPOSTELA | 31/05/2021 | Actualizada ás 16:37
O comité clínico que asesora á Xunta na toma de decisións fronte á covid-19 reunirase este martes para analizar, de novo, os datos dos concellos, unha semana despois de tomar as últimas medidas, que entraron en vigor o pasado sábado. Aínda que non están previstos grandes cambios, traballa co horizonte de, en "dúas semanas", poder eliminar as restricións de mobilidade nocturna e do dereito de reunión.
Así o confirmou a exconselleira de Sanidade e actualmente responsable de Cáritas na Coruña, Pilar Farjas, quen indicou que nese período de tempo pódese reducir a incidencia a 50 casos por cada 100.000 habitantes, é dicir, que toda Galicia se sitúe no nivel de risco baixo.
As medidas de máxima restrición supoñen toque de queda entre as 23 e as 6 horas, peche perimetral salvo para actividades esenciais e prohibición de encontros de non convivientes. Ademais, nestes municipios a hostalaría ten que permanecer pechada, só con servizo de regocida e para levar, e os aforamentos son reducidos ou hai actividades pechadas.
No resto de Galicia, con variacións nos aforamentos --en hostalaría e outras actividades--, permítense os encontros de dez persoas en exteriores e de seis en interiores, xa sexan en hostalaría ou en domicilios particulares. Con todo, están prohibidos os encontros de non convivientes entre a 1 e as 6 da madrugada.
AFECTAN A DEREITOS CONSTITUCIONAIS
Farjas lembrou que as limitacións de mobilidade nocturna e a reunión afectan a dereitos constitucionais, polo que o Tribunal Superior de Xustiza de Galicia (TSXG) está especialmente vixiante para que as medidas que se adopten respondan a un criterio de "proporcionalidade" e, neste sentido, os propios xuíces lembraron no seu último auto que a situación epidemiolóxica está a mellorar no conxunto da comunidade.
En días pasados, o presidente da Xunta, Alberto Núñez Feijóo, declarou que Galicia conseguira esquivar a cuarta onda do coronavirus. Neste sentido, Pilar Farjas, destacou que a Comunidade galega encara o "cuarto mes" de melloría e está entre o catro comunidades con mellores datos epidemiolóxicos.
A integrante do comité clínico destacou a "melloría clara" e a "diminución progresiva" nas hospitalizacións, cun 20 por cento menos na última semana, xunto cun impacto na redución da mortalidade.
PREOCUPAN OS MOZOS
Con todo, Pilar Farjas advertiu de que o virus "segue circulando" entre o non vacinados, polo que preocupan os "brotes escolares, sociais e os laborais", xa que son os menores de 50 anos os que aínda non están inmunizados.
"Os brotes son importantes porque estamos con cepas moito máis rápidas en contaxio", indicou, á vez que destacou que está a ser "moi rápida" a detección dos casos grazas á investigación e rastrexo. De feito, lembrou que coa proba piloto de rastrexo a máis de sete días detectáronse 33 casos e sinalou que tamén se está ampliando o concepto de contacto estreito, o que permitirá a "eficaz" detección e delimitación dos contagios.
Farjas, que defendeu que o número de persoas que se pode reunir sexa o mesmo en hostalaría que en domicilios privados, apuntou aínda que é certo que se reduciron os ingresos, "o risco" de que os mozo se infecten co coronavirus é "o mesmo" que o que tiñan en xaneiro, posto que non están vacinados. Por iso, chamou a manter a prudencia entre estas persoas e defendeu manter restricións que afectan á poboación maior xa vacinada, pero en aras de conter o avance epidemiolóxico.
MELLORÍA DE LOBIOS
Pilar Farjas non quixo adiantarse á análise que poida facer este martes o comité clínico sobre os concellos, pero si que destacou a melloría de Lobios --que encadeou dúas semanas de peche perimetral, toque de queda e sen reunións nin hostalaría--.
Tamén indicou que localidades como Viveiro tamén se espera que "vaian mellorando", aínda que segue por encima dos 250 casos por cada 100.000 habitantes; mentres que se referiu a Mos, que "segue en situación complicada pero tamén está a mellorar" e podería "baixar do máximo".
"CONTROL MÁIS RÁPIDO"
A integrante do comité clínico asegurou que "a situación se está controlando máis rápido", polo que a expectativa é "seguir avanzando" e lograr pasar en dúas semanas dunha taxa de 70-72 casos a unha de 50 e, por tanto, que toda Galicia se sitúe no nivel máis baixo de risco.
"Nun par de semanas, á velocidade que imos, podemos estar nese escenario de risco baixo de toda Galicia e expondo as restricións nocturnas, o uso de máscara no exterior...", expuxo Farjas, quen advertiu de que "seguirá habendo brotes puntuais", sobre todo, vinculados a "mozos, lecer, centros escolares e contorna laboral".
