Confirmados 11 positivos en covid-19 tras unha cea de máis dun cento de médicos da área de Santiago
Realizouse un cribado a todos os participantes na cea cuxos resultados se coñecerán este xoves.
Por Europa Press / Redacción | Santiago de Compostela | 15/12/2021 | Actualizada ás 20:05
A área sanitaria de Santiago de Compostela e O Barbanza confirmou que once profesionais sanitarios foron diagnosticados como positivos en covid-19. A orixe dos contaxios estaría vinculada cunha cea recente na que participaron uns 120 médicos residentes da área compostelá.
Fontes da área consultadas por Europa Press ratificaron que, ata o momento, hai confirmados un total de once casos positivos e ao longo desta mesma xornada realizouse un cribado a todos os participantes na cea cuxos resultados se coñecerán este xoves.
De feito, o cribado foi máis amplo, e a convocatoria lanzouse para máis de 300 especialistas en formación dos distintos servizos. O obxectivo é que o resultado da PCR permita determinar se hai máis contaxios de participantes nesa cea ou de contactos posteriores.
A relación entre os casos remóntase a unha cea celebrada días atrás e da que, segundo remarcan as fontes sanitarias, non tiña coñecemento a dirección hospitalaria.
De feito, lembra que este tipo de ceas contraveñen as recomendacións dadas expresamente ao persoal dos servizos sanitarios no marco da pandemia e, en concreto, da tendencia que rexistra Galicia nas últimas semanas.
Tras constatar a existencia deste gromo, remitiuse un escrito aos xefes de servizo no que se insta a abordar cos seus equipos a necesidade de actuar con responsabilidade dada a situación e o propio papel de exemplo dos sanitarios, ademais de subliñar que o impacto, se a evolución da covid-19 é negativa, recaerá na sanidade.
