O comité clínico reunirase por primeira vez desde que a Xunta levantou a alerta sanitaria
Comesaña ratifica que se "se mantén" a situación actual non se implantarán novas medidas, pero si se Galicia sobe de nivel
Por Europa Press / Redacción | SANTIAGO DE COMPOSTELA | 17/12/2021 | Actualizada ás 19:08
O comité clínico que asesora á Xunta reunirase a próxima semana, antes das datas crave de Nadal, para analizar a situación da pandemia e observar se se inclúe algunha medida adicional, aínda que o Goberno autonómico pretende evitar máis restricións e fiar á vacinación e ao certificado covid as medidas xerais para evitar a escalada dos contaxios.
Será a primeira reunión despois de que a Xunta levantase a alerta sanitaria, que deixou como órgano de control o subcomité clínico de vixilancia de brotes, con reunións semanais.
En declaracións aos medios, o conselleiro de Sanidade, Julio García Comesaña, indicou que aínda falta por pechar a data e determinar o alcance da reunión. "Os datos seguen non sendo bos", recoñeceu o titular da carteira sanitaira, pero matizou que, "aínda que nunca pode ser razoable ter pacientes ingresados en UCI", a presión hospitalaria está en parámetros "razoables". Neste sentido, tamén sinalou que a situación de tensión en Ourense "está controlada", mentres que en Vigo aínda segue habendo algo de presión hospitalaria.
"Isto fainos seguir expectantes", apuntou o titular de Sanidade, quen indicou que aínda faltan uns días para coñecer o efecto do final da ponte na incidencia da pandemia. "Estamos espserando a confirmar se estes datos que estamos a ver agora se estabilizan", apuntou, polo que apelou ao "comportamento" de responsabilidade colectivo en xeral coas celebracións de nadal e as festas que veñen en próximos días.
"Estamos a piques de pasar dun nivel de contaxios que nos levaría a tomar medidas, aínda que se as cousas seguen como estamos", remarcou, esperan seguir mantendo as actuais, que en xeral son o certificado covid e mesas de máximo oito persoas en interior en hostalaría.
Ademais, seguirase co "esforzo" de vacinación, que en Galicia xa arrincou no tramo de 50 a 59 anos, e outras medidas puntuais como a prohibición de cócteles e aperitivos de pé. Ademais, desde esta fin de semana inclúese o pasaporte covid en residencias, hospitalización de día, ximnasios e eventos masivos ou nos que se vendan alimentos.
NON MÁIS RESTRICIÓNS
"En principio non vai haber restricións" adicionais, apuntou Comesaña, que explicou que a decisión de prohibir os cócteles vén dunha suxestión do subcomité clínico e débese a que son eventos con mobilidade sen máscara dos comensais.
"Temos que esperar a ver se os datos consolídanse na tendencia de días anteriores ou este incremento de onte e hoxe empezan a mostrar o efecto da ponte. Se non é así, se os datos se manteñen, podemos seguir como ata agora, se non, haberá que expor outro tipo de medidas", remarcou.
PROBAS
Comesaña defendeu que Galicia está nos niveis de probas diagnósticas "máis altos" de toda España, ao que hai que sumar os test en saliva de farmacia que non se computan na estatística estatal. "Sempre foi unha constante", defendeu, para ratificar a capacidade diagnóstica da comunidade.
A isto, tamén hai que sumar as probas de autotest, que defendeu como unha medida de prevención da poboación, á que lembrou que en caso de positivo é preciso activar os protocolos e confirmar a través de PCR.
Neste sentido, tamén lembrou que un test que arroxe un resultado negativo só mostra unha "foto fixa".
