Terremotos con magnitudes entre 1,6 e 3 afectan ao municipio de Covelo, sen causar danos, dende hai varios días
Un tremor rexistrado está mañá sentiuse tamén en As Neves, Mondariz e Ponteareas.
Por Europa Press / Redacción | VIGO | 18/01/2022 | Actualizada ás 10:28
Unha sucesión de pequenos movementos sísmicos con epicentro no municipio pontevedrés de Covelo 'sacoden' a zona desde hai varios días, con intensidades entre 1,6 e 3 segundo a escala Richter, e non se rexistraron danos, segundo confirmaron a Europa Press fontes municipais.
Segundo se recolle nos rexistros do Instituto Xeográfico Nacional, o primeiro dos tremores notouse o pasado domingo, sobre as 15,30 horas (hora local) e a magnitude foi de 2,3. O luns rexistrouse outro tremor, pasadas as 21,00 horas, de magnitude 2.
Na madrugada e a mañá deste martes tamén se rexistraron varios movementos sísmicos. Segundo os datos do Instituto Xeográfico Nacional, o primeiro deles tivo lugar ás 1,00 horas da madrugada e alcanzou a magnitude 2,3.
Durante toda a madrugada producíronse pequenos terremotos, de magnitude inferior a 2, pero ás 8,33 horas desta mañá tivo lugar un tremor de intensidade 3. Este sismo notouse en Covelo, As Neves, Mondariz e Ponteareas e, poucos minutos despois de que se producise, rexistrouse unha réplica de menor intensidade (2,4).
