O socialista Villarino recorrerá o arquivo da causa contra Baltar e deputados do PP e DO por prevaricación
O portavoz socialista na Deputacón de Ourense di que a querela vai "contra o presidente da institución e contra os portavoces do PP e de DO".
Por E.P. | SANTIAGO DE COMPOSTELA | 11/01/2023 | Actualizada ás 18:15
O portavoz socialista na Deputación de Ourense, Rafael Rodríguez Villarino, avanzou que interporá recurso contra a decisión do xulgado de Instrución número 1 de Ourense de arquivar da causa aberta pola denuncia sobre un posible delito de prevaricación contra o presidente da Deputación, Manuel Baltar, e os portavoces, no ano 2020, do Partido Popular, Rosendo Fernández, e de Democracia Ourensana, Miguel Caride.
En concreto, Villarino dixo "non compartir" os argumentos esgrimidos polo titular do xulgado para tomar esta decisión, que se produciu "mesmo sen citar a declarar" aos querellados.
Para Villarino existen "indicios evidentes, manifestados publicamente" de que adoptaron "unha decisión inxusta a propósito", argumentando que lle denegaron "como vinganza" unha compatibilidade laboral a tempo parcial como docente universitario, "a pesar de contar con informes técnicos e proposta de resolución favorables".
Na mesma liña, o portavoz socialista subliña que esta negativa, acordada no pleno provincial de xullo do 2020, foi anulada pola Xurisdición Contencioso-Administrativa.
O xulgado fixo pública este mércores a súa decisión de sobreseer e arquivar esta causa, que se abriu por mor dunha querela interposta polo portavoz do PSOE na institución provincial contra o ente supramunicipal por impedir a compatibilidade do seu cargo co desempeño do seu posto de profesor no campus da Universidade de Vigo en Ourense.
O maxistrado explica no auto que "en ningún caso pode ser considerado como contrario ao ordenamento xurídico" o feito que os grupos provinciais dos querellados rexeitasen a solicitude do deputado provincial do PSOE, en réxime de dedicación exclusiva, para compatibilizar o seu cargo.
Así mesmo, o instrutor sinala como "significativo" o feito de que a querela "non se dirixe contra todos os deputados provinciais que votaron en contra da compatibilidade, senón unicamente contra o presidente da institución e contra os portavoces do PP e de DO", o que o leva a concluír que "se utiliza como un instrumento de vendetta política".
Así mesmo, considera "posible" que se produza "un cambio de opinión" dos deputados provinciais e por iso "non hai un acordo idéntico" ao que houbo en 2019, cando se lle recoñeceu o dereito ao querelante.
Si recoñece a sentenza que, no debate previo á votación do pleno, o portavoz do PP afirmou que o solicitante non merecía a compatibilidade porque, ao seu xuízo, "non cumpría a exclusividade que ten recoñecida na Deputación". Tamén que o deputado de DO apuntou que cando a algún deputado recoñéceselle a compatibilidade "estáselle facendo un favor" e que, "polo comportamento do interesado prefería non facerlle este favor".
Deste xeito determina que, "aínda admitindo" que o voto emitido polos deputados "teña por obxecto castigar a conduta belixerante do querelante", iso "non os converte en acredores dunha sanción penal" porque "o voto é defendible desde un punto de vista xurídico".
