O PSOE acusa ao goberno do BNG en Pontevedra de "torpedear" proxectos socialistas
"Non entendo que Pontevedra se some ao carro da estratexia que seguen as cidades e comunidades onde Vox goberna co PP, freando iniciativas contra o cambio climático", sinalouo portavoz socialista Iván Puentes.
Por E.P. | PONTEVEDRA | 13/10/2023 | Actualizada ás 18:14
O portavoz do grupo municipal do PSdeG-PSOE, Iván Puentes, acusou de "revanchismo político" ao goberno do BNG no Concello de Pontevedra porque, di, desde o inicio do mandato dedicáronse a "torpedear, paralizar e pór en cuestión todos os proxectos herdados das concellarías que xestionaba o Partido Socialista".
Iván Puentes fixo estas declaracións este venres nunha rolda de prensa que convocou para rebater as declaracións do alcalde Miguel Anxo Fernández Lores e do concelleiro César Mosquera nas que criticaron a falta de estudos que certifiquen a viabilidade do destape do tramo cuberto do río Gafos ao seu paso polo barrio de Campolongo.
Puente afirmou que resulta "inexplicable" que o BNG, "que é supostamente de esquerdas e que cre no cambio climático", paralice esta "aposta pola renaturalización e o reverdecimiento das cidades". "Non entendo que Pontevedra se some ao carro da estratexia que seguen as cidades e comunidades onde Vox goberna co PP, freando as iniciativas de loita contra o cambio climático", sinalou.
A primeira fase deste proxecto ten concedida unha subvención de 2,3 millóns de euros de fondos europeos que, a xuízo dos socialistas, corre o risco de perderse, xa que a obra ten que estar executada e recepcionada a 31 de decembro de 2025. "Se nos enredamos en máis estudos, o único que facemos é demorar a execución, perder o diñeiro e lograr o que eu penso que é o motivo oculto do BNG: que non se faga esta obra", aseverou.
Para o alcalde de Pontevedra este proxecto segue estando entre as súas prioridades, pero reitera que, antes de abordar unha actuación destas características, débense facer unha serie de estudos que garantan a súa viabilidade.
Lores sostén que ata agora "non se fixo absolutamente nada", unhas declaracións que para Iván Puentes son "mentiras absolutas" como, segundo dixo, pódese comprobar revisando o expediente e a documentación sobre o proxecto.
O portavoz socialista acusou de "descoñecemento" e "desinterese" ao goberno local do BNG sobre a execución desta obra "perfectamente viable" como avalan trece documentos técnicos procedentes da Comisión Europea, o Goberno estatal ou a Xunta. Para Iván Puentes o estudo geotécnico que demanda o alcalde debe realizarse unha vez que se decida o proxecto a executar e non antes.
"Temos aval técnico, institucional e da cidadanía para poder sacar adiante esta obra", defendeu Puentes, que esixiu aos seus anteriores socios no goberno local "que non enreden, que non paralicen". "Se non queren abrir o Gafos en Campolongo que o digan claramente para que actuemos os demais en consecuencia para poder executar esa obra", apostilou.
RESPOSTA DO ALCALDE
O alcalde de Pontevedra, Miguel Anxo Fernández Lores, foi rotundo na súa resposta a esta polémica: "eu quero levantar o Gafos pero non o vou a facer sen garantías". "Mentres eu sexa alcalde non se vai empezar un proxecto de obra que pode levar por diante o patio do colexio de Campolongo, senón parte do propio Colexio", declarou o rexedor da capital en referencia a este proxecto de destapar o Gafos.
O alcalde insistiu na necesidade de estudos sobre os terreos polos que atravesa o río neste tramo urbano en relación ás posibles inundacións que se poderían producir xa que coa documentación que existe agora "non hai garantía de que isto non pase".
