O 65% dos galegos en diálese deben desprazarse fóra da súa localidade para recibir tratamento

O 65% dos pacientes en diáleses en Galicia teñen que desprazarse fóra da súa localidade de residencia para recibir tratamento, segundo un estudo realizado por Alcer (asociación para a loita contra as enfermidades renais) en catro comunidades autónomas (Aragón, Castela-A Mancha, Valencia e Galicia).

Segundo explican nun comunicado, a galega é a comunidade con maior dispersión xeográfica de entre as analizadas, con máis dun 65% (65,66%) dos pacientes que se teñen que desprazar a outra localidade para recibir o tratamento de hemodiálisis ou de ser atendidos no seu hospital de referencia (67,34%), o que implica que tiveron o mesmo problema cando estiveron en pre-diálese.

A nivel xeral, o estudo revela que máis da metade das persoas en diáleses teñen que desprazarse fóra da súa localidade para recibir o tratamento. O estudo realizouse sobre unha mostra de 5.740 pacientes residentes en 13 provincias destas 4 Comunidades.

En concreto, e segundo este estudo, o 50% das persoas en hemodiálisis teñen o seu hospital de referencia nunha localidade distinta á que residen, e o 55% destas persoas se dializan nun centro fóra da súa localidade de residencia.

Estes datos levan á asociación a pedir ás administracións sanitarias "medidas para corrixir este fenómeno de dispersión xeográfica, que dificulta o acceso aos tratamentos e prexudica a calidade de vida das persoas que viven con Enfermidade Renal Crónica (ERC)", cun especial impacto sobre as persoas maiores e que viven no medio rural.

Apuntan que son as provincias con maior poboación rural as que teñen máis porcentaxe de pacientes que precisan desprazarse ao seu hospital de referencia, con porcentaxes próximas ao 70%. "Ás limitacións propias da ERC e o seu tratamento e á necesidade de desprazarse, estas persoas que viven no medio rural, nunha localidade distinta á do seu centro de referencia, suman ademais as menores posibilidades de transporte público e a maior redución de horarios", indican.

Con todo, matizan que non se trata dun problema exclusivo do medio rural. "Cando a provincia analizada conta cun gran núcleo urbano ou varios, a porcentaxe de persoas que deben desprazarse para recibir atención e recoller a súa medicación é menor, pero aínda así una de cada tres ten que desprazarse", explican.

"Isto implica importantes trastornos para unha poboación de media de idade próxima aos 70 anos, así como para a súa contorna social e familiar", explicou este luns durante a presentación do estudo Daniel Galego, presidente de Alcer.

O estudo presentouse no 53 Congreso Nacional da Sociedade Española de Nefrología, que se celebra ata este luns en Palma de Mallorca coa participación de 1.200 nefrólogos e expertos nacionais e internacionais.

O ESTUDO

O estudo incluíu a 5.740 pacientes residentes en 13 Provincias de 4 Comunidades Autónomas diferentes: Huesca, Teruel e Zaragoza, en Aragón; Ciudad Real, Cuenca e Toledo, en Castilla la Mancha; Alacante, Castelló e Valencia, na Comunidade Valenciana; e A Coruña, Lugo, Ourense e Pontevedra, en Galicia.

A Comunidade Valenciana é a que menor dispersión xeográfica presenta das que se analizaron, con menos do 40% (38,4%) que precisen desprazarse a outra localidade para ser atendidos no seu hospital de referencia ou de algo máis dun 35% (35,4%) para recibir o seu tratamento de hemodiálisis.

Por provincias, Alacante (26,9%), Lugo (28,6%), Zaragoza (30,6%) e Valencia (36,5%) son as provincias con menor dispersión xeográfica das analizadas. Son as que teñen unha menor porcentaxe de pacientes que deben desprazarse ao seu hospital de referencia desde unha localidade distinta.

En cambio, Teruel (78,90%), A Coruña (70,36%), Castelló (68,33%), Cidade Real (65,20%) e Ourense (64,29%) son as provincias analizadas con maior porcentaxe de persoas que se deben desprazar a unha localidade distinta da de residencia, para recibir atención no seu hospital de referencia.

Pacientes en diálese | Fonte: Arquivo