A galega Pilar Cancela, nova secretaria de Estado para Migracións
Formará parte da delegación compostelá para a convención política do PSdeG os días 16 e 17 de decembro.
Por E.P. | Madrid | 02/12/2023 | Actualizada ás 14:57
A ata agora secretaria de Estado de Cooperación Internacional, a socialista galega Pilar Cancela, pasará a ocupar o cargo secretaria de Estado de Migracións dependente do Ministerio de Inclusión, que dirixe Elma Saiz.
Fontes socialistas consultadas por Europa Press confirmaron a información avanzada por 'eldiario.es' e que a que fose presidenta da xestora do PSdeG tras a dimisión no seu día do José Ramón Gómez Besteiro como secretario xeral --previamente foi a súa secretaria de Organización-- porase á fronte de Migracións nesta nova etapa do Goberno que dirixe Pedro Sánchez.
Pilar Cancela (Stuttgart, 1967) é licenciada en Dereito e ten título superior de Prevención de Riscos Laborais. Exerceu como mediadora e foi directora Xeral de Relacións Laborais da Xunta de Galicia (2002-2003 e 2005-2009). É funcionaria do Corpo Superior da Administración Xeral da Xunta de Galicia desde 1993.
CONVENCIÓN POLÍTICA
Precisamente, este sábado o PSOE compostelán elixiu delegación para a convención política autonómica do PSdeG que terá lugar os días 16 e 17 de decembro co obxectivo de sentar as bases do ideario da formación para as eleccións autonómicas --nas que Besteiro será o candidato a presidir a Xunta--.
A delegación estará formada por integrantes da comisión executiva municipal, do grupo municipal, a deputada na Cámara galega Noa Díaz e Pilar Cancela.
O secretario local dos socialistas, Aitor Bouza, remarcou a confianza do partido nas posibilidades de Besteiro fronte a un PPdeG, que terá ao actual presidente, Alfonso Rueda, como candidato, cuxo "nerviosismo desquiciante" constatou: "O único que propón aos galegos e galegas é crispación".
