Rueda chama a evitar que Galicia caia "en mans do nacionalismo enfurruñado"
O candidato do PPdeG á reelección reivindicou una comunidade de cidadáns que se sienten "orgullosamente galegos e españois" nun mitin celebrado en Baiona.
Por Europa Press / Redacción | SANTIAGO DE COMPOSTELA | 08/02/2024 | Actualizada ás 20:51
O presidente da Xunta e candidato do PPdeG á reelección o 18F, Alfonso Rueda, fixo este xoves un chamamento a acudir ás urnas de forma masiva para evitar que Galicia "en mans do nacionalismo enfurruñado" e do "non" que busca "a imposición lingüística" e importar "problemas" que se viven noutras autonomías como Cataluña con propostas como "declarar a independencia".
Fronte a quen quere "dividir e separar", o dirixente popular reivindicou unha comunidade "unida" de cidadáns que senten, como el mesmo, "orgullosamente galegos e españois". "Quero unha Galicia que sexa para todos pensen o que pensen, nos vaian a votar ou non", proclamou, antes de advertir que "os únicos galegos de verdade non son os que votan ao nacionalismo".
"Os que votan ao nacionalismo tamén son galegos, por suposto. Pero nós tamén. E a moita honra. Por tanto, a cabeza moi alta. O pobo galego é grande porque é un pobo plural", aseverou, nun mitin en Baiona (Pontevedra), nun día de temporal no que, aínda con temporal e cadeiras baleiras, os populares reuniron unhas 400 persoas no auditorio da localidade.
De feito, o alcalde, Jesús Sánchez Almuiña, encargado de dar o pistoletazo de saída do mitin, declarouse "moi orgulloso" porque nesta localidade se puido manter o acto político desta tarde, mentres que noutros municipios, dixo, suspendéronse eventos ligados ao 'Entroido'.
Neste escenario e como Rueda chegou media hora tarde, Almuiña, exconselleiro de Sanidade, chanceou con que a súa "avioneta" estaba a piques de aterrar no Parque da Palma pero que tiña problemas co "vento". E o rexedor, que recuperou o poder nas últimas municipais, tirou de exemplo local para explicar o que pasaría en catro anos coa Xunta en mans das forzas de esquerdas.
"Non hai máis que ver o desgoberno de aquí", sinalou, antes de ironizar con que, aínda que din que o PP "é o partido dos ricos", os seus concelleiros tiveron que ocuparse de "arranxar e limpar as pingueiras" que deixaron os seus antecesores.
Tras Almuiña, interveu Ana Iglesias, candidata que representa ao Val Miñor, quen tamén apelou a fuxir das "leas" e do "barullo" que atribuíu aos seus rivais políticos; mentres que o rexedor baionés pediu o apoio non só para as siglas do PP, senón para "o único coñece a comarca" e é o máis "experimentado".
"E como saben os homes do mar, cando o tempo está bo calquera é patrón, pero cando hai temporal, mellor que o patrón teña experiencia, que coñeza o mar e que saiba do que está a falar", concluíu o alcalde, nun acto no que tamén interveu o presidente provincial, Luís López, 'Lugués'.
