O PSOE ábrese a negociar co BNG unha nova modificación de crédito no Concello de Pontevedra
Iván Puentes asegurou que seguirá "negociando e falando para facer gobernable esta cidade".
Por Europa Press / Redacción | SANTIAGO DE COMPOSTELA | 22/05/2024 | Actualizada ás 16:21
O grupo municipal do PSOE no Concello de Pontevedra mostrou a súa disposición a negociar co goberno local do BNG a aprobación dunha modificación de crédito. O portavoz socialista, Iván Puentes, asegurou que o seu partido seguirá "negociando e falando para facer gobernable esta cidade" e neste contexto enmarcou as conversacións que iniciou co concelleiro de Facenda, o nacionalista Raimundo González Carballo, para facer posible a aprobación dunha terceira modificación de crédito neste 2024.
"Veremos que froitos dan e cal é a actitude do BNG", dixo Iván Puentes, que advertiu que negociarán "a condición de que se cumpra a premisa de que responda o programa de ambos os partidos políticos e ás prioridades de investimento que cada un temos". Nunha rolda de prensa celebrada este mércores, Iván Pontes cualificou de "claramente deficitario" o primeiro ano de mandato do alcalde de Pontevedra, Miguel Anxo Fernández Lores, "pola teimosía do BNG en buscar máis o conflito que o acordo". Segundo asegurou "o sentir que hai na rúa" é que o goberno local do Bloque "está case nunha fase de retirada, esperando a que pasen o tres anos que quedan".
O portavoz do PSOE sinalou que a "parálise" que, ao seu xuízo, padece o concello resulta "bastante comprensible" xa que 9 edís están a exercer as funcións que noutros momentos chegaron asumir 15 concelleiros. Iván Puntes tamén comentou que a oposición que leva a cabo o PSOE "consiste en negociar, ás veces con dureza, en escoitar e en tentar pactar" mentres que a do Partido Popular "tradúcese en votar en contra de calquera iniciativa" do goberno local "facendo unha política de terra queimada" para "desgastar politicamente ao BNG".
"Eu alégrome de que (Lores) nos siga cualificando de socio preferente", apuntou Iván Pontes, "máis que o cualificativo, o que agradezo é que exista vontade real de diálogo". Para o portavoz socialista, "queda moito mandato por adiante" e neste tres anos que quedan "o PSOE vai estar aí para poder prestar a súa colaboración".
